Isumat.com/Hunyo 14, 2021
Ginlalauman nga maabot ha Tacloban City dida hiton Hulyo an 6 Mil ka doses han Moderna nga bakuna kontra han Covid-19.
Igin-asoy ni Eugene Tan, Presidente han Philippine Chamber of Commerce and Industry (PCCI-Tacloban Leyte) nga an ira grupo in nag-angkat han nasabi nga bakuna basi gamiton para han mga kaapi han pamilya han mga negosyante sugad man an ira mga magtatrabaho.
Ini nga mga negosyante in namumutang ha Tacloban City ngan pira nga mga bungto han Leyte. Waray liwat igsumat ni Tan kun hira hin-o an mga negosyante ngan kun ano an ngaran han mga kompaniya nga ira gintatag-iyahan.
Dida han pamaki-ana han iFM-RMN Tacloban, nagsering hi Tan nga 3 Mil ka tawo an makakatagamtam han nasabi nga bakuna.
An grupo han lokal nga mga negosyante in nag-aragmot para han pagpalit han nasabi nga bakuna kantidad hin 10 Milyones pesos.
Nagsering pa hi Tan nga waray bayad an mga trabahante han mao nga mga negosyante para han nasabi nga bakuna.
An mga personales han RHU-Palo, Leyte an magdudumara han panmakuna, pahayag pa ni Tan. #
