Isumat.com/Hunyo 10, 2021
Waray duda nga gingamaan ngan klaro gud an pag-ikaparatay kan Calbayog City Mayor Ronaldo Aquino hadto nga madugo nga panhitabo didto han nasabi nga syudad hadton Marso 8, 2021, subay han pahayag han National Bureau of Investigation (NBI).
Dida han public hearing ha senado kakulop, Hunyo 9, igindig-on ni Eastern Visayas NBI Chief Jerry Abiera nga an grupo han kapulisan in nag-ambush kan Aquino ug han iya mga kaupdanan hadto nga adlaw. Iya pa igindugang nga pira na ka bulan nga ginplano ini han mga suspetsado antis ini pagbuhaton.
Kasumpay hini, nagpahayag an NBI Official nga an ira ahensya in ha deri maiha nga panahon magsasalawad hin mga kaso nga multiple murder ngan frustrated murder ngadto han masunod nga mga kaapi han PNP: Lt Col Harry Sucayre, Major Cyrel Tan, Capt Dino Golez, Lt Julio Armesa, Sgt Neil Cebu, Sgt Edsel Omega ngan pira nga mga sibilyan nga waray pa pagngarani.
Labot la han nasabi nga mga kaso kriminal, magsasampa gihapon hin administratibo nga reklamo an NBI kontra han mao nga mga opisyales han PNP Regional Office 8.
Iginbuyagyag ni Abiera nga subay han ira pag-istudyo han mga tawag ngan text ha telepono nga nakuha tikang han mga suspetsado, tikang pa han Oktubre 2020 an paghimugso han plano nga patayon hi Aquino. Tikang hito nga takna, iginpa-ilarum na hin surveillance an alkalde ug an iya mga aktibidadis.
Nasabtan gihapon han NBI nga dida han mga mensahe ha text, nalutaw nga iginlalambing han mga suspetsado hi Aquino ha iligal nga droga. Ini in mahugot nga pinanhimuwa han PNP ngan PDEA nga nagsering nga hi Aquino in deri apil han drug watch list ha Region 8
An NBI in nagpatamak han ira pahayag dida ha mga testmonya hin sobra 50 nga testigos, lakip na an mga CCTV Footage nga nakuha hin pira nga testigos.
Pahayag pa ni Abiera, hadto nga adlaw han panhitabo, klaro gud ha CCTV nga ginsundan han kolor biege nga Innova an Hilux Van ni Aquino. Ini nga Innova amo an sinakyan ni Major Joselito Tabada nga namatay gihapon dida han insidente.
Pag-abot ha lugar han krimen, an sarakyan ni Aquino in ginbunggo hin usa nga Toyota White Pick-Up rason nga nahingadto han railings han tulay an sarakyan han alkalde ngan waray na maka-abante.
Dida hini, nagka-haw-as an mga sakay han Innova ngan Pick-up ngan nagliwan-liwan pagpa-arak hin bala ha sarakyan ni Aquino. Kataliwan hini, usa katawo an duma-op ngadto han sarakyan han mayor ngan ginpusil pa an alkalde.
Nagsering an NBI nga sakay han Pick-Up Toyota hi Sucayre.
Hi Aquino ug duha han iya kaupod an namatay, samtang hira Tabada ngan Sgt Laoyon in naawat an kinabuhi ha panig han kapulisan.
Ini nga pagsaysay han NBI in tarihas han pag-asoy han PNP nga shoot-out an natabo tungod hin misencounter.
Nagsering an PNP nga an Toyota Pick-up an nabang-gaan han Van ni Aquino ngan tungod kay waray nira panhikilal-i an mga sakay hini, nagkaada hin pinusilay. Nag-insister gihapon an PNP nga lehitimo an operasyon han kapulisan kay mayda nira ginmamanmanan nga dudable nga gi-os hin ira igkasi mga pulis.
Hadton Abril 16, an PNP in nagpasaka hin mga kaso nga homicide ngan frustrated homicide kontra kanda Sucayre tungod han pagkamatay nira Aquino.
Nagsampa gihapon an PNP hin kaso nga murder kontra han anak han alkalde nga hi Mark Aquino. Nag-akusar an PNP nga hi Mark ug an kaupod niya nga police escort an nagpusil ngan nakamatay kanda Tabada ngan Laoyon.
Ini in igindiwara naman han anak han mayor, kay sumala ha iya, imposible nga matatabo adto kay naghuhulat hiya hadto nga takna han iya tatay didto han ira resort basi tumambong han selebrasyon han iya kaadlawan.
Iginpahayag pa ni Mark nga umabot la hiya ngadto han lugar han insidente katapos niya masabtan nga may natabo ngan pagdangat niya ngadto, mamingaw na ngan damo na hin duro an mga usyusero nga katawhan.
Dida gihapon han nasabi nga hearing, nagsumat an NBI nga padayon pa nira gin-iimbestigar an panhitabo basi matudlok gud an mastermind hini. Ginsususi gihapon han ahensya kun konektado ba ha pulitika ini nga makarimadima nga insidente.
Hi Senador Ronald Dela Rosa, mangulo han komitiba nga nag-iimbestigar han insidente, in nagpahayag nga magtatalaan hira hin sunod nga hearing basi pamati-an an mga pag-asoy han iba nga indibidiwal nga iginlalambing. #
