Isumat.com/Mayo 25, 2021
Natad-an han mga residente ha magkalain nga barangay ha Calbayog City, Samar ngan Bato, Leyte in duha nga patay nga lawas hin kalalakin-an kakulop, Mayo 24, 2021.
Ha report han Calbayog City PNP, alas 7:30 han aga han makakarawat hira hin tawag ha telepono tikang kan Brgy Kapitan Allan Trani han Bagacay, Calbayog nagsusumat nga mayda lawas hin lalaki nga natad-an ha kabaybayunan ha ira lugar.
Dida han panguna nga imbestigasyon, ginkilala an biktima nga hi Leonido Yrigan, 76 anyos, tricycle driver, ngan nag-uukoy han mao nga barangay. Kadagmitan gindara ini ha punerarya ngan tobtob yana ginsususi pa han mga otoridad an hinungdan han kamatay ni Yrigan.
Samtang, didto naman ha Bato, Leyte, an mga residente han Brgy Dawahon in nakatara han lawas han biktima nga ginkilala nga hi Cirilo Inoc Jr, waray asawa, mangirisda ngan nag-uukoy han mao nga lugar.
Pasado alas 12 han maagahon han matad-an an biktima ha ligid han kadagatan, sanglit iginreport ini ha mga tinubyanan han balaud.
Nagsumat an mga residente nga nagtambong hin karisyuhan hi Inoc ngan nahubog hiya.
Hi Dr Probo Quijano, Municipal Health Officer an nagpahayag nga subay han iya eksaminasyon, an biktima in namatay tungod hin kalumos ngan waray nahitabo nga foul play.
An Dawahon in usa nga isla nga barangay han municipalidad han Bato. #
