Isumat.com/Mayo 6, 2021
Magdudurot hin dako nga pagdukwag para hin magkalainlain nga sektor ha probinsya han Samar an pagkaada hin bag-o nga mga facilidadis an Calbayog Airport.
Hadin Mayo 5, hira Transportation Secretary Arthur Tugade, CAAP Director General Jim Sydiongco ngan mga higtaas nga opisyales han lalawigan an nanguna han inagurasyon han bag-o nga Passenger Terminal Building. Tungod hini, tikang han 76-katawo nga kapasidad han daan nga terminal, makaka-akomodar na ini yana hin 450 nga pasaheros.
Labot la han bag-o nga terminal building, natapos na gihapon an ginpahaluag nga runway, expanded apron, runway end safety area, vehicular parking area, security fence ngan drainage system han nasabi nga airport.
Dida han iya pamulong, hi Tugade in nagpahayag nga an makakabenefecio hini nga mga proyekto amo an turismo ngan negosyo nga makakagduso han pag-uswag han ekonomiya. Sumala pa ha iya, naningkamot an gobyerno nga makumpleto hin kadagmitan ini nga mga infrastraktura basi pag-abot han tinatawag nga “New Normal” andam na an mga facilidad para dayon mahigamitan han publiko.
Nagsering pa hi Tugade nga deri la an Samar an makaka-abat han maupay nga epekto han proyekto kundi pati na an paghagrani nga mga probinsya ngan bug-os nga rehiyon.
Sumala han pahayag han Department of Transportation, gintrabaho han ira ahensya an pagpaka-upay han mga airport ha Biliran, Borongan, Catarman, Maasin, Ormoc ngan Tacloban.
Ginlalauman gihapon nga magbubunga hin ginatos-gatos nga pakabuhi an nasabi nga Calbayog Airport ha takna nga magin fully-operation na ini.
An Philippine Airlines in nagpasamwak nga tinikangan hiton Hulyo magkakaada na hira han kinada-adlaw nga biyahe para han Manila-Calbayog-Manila nga ruta. #
