Isumat.com/Mayo 5, 2021
An pamilya han nawara nga Philippine Star Entertainment Editor Ricky Lo in deri pa magpapahayag han detalye han iya kamatayon komo pagrespeto ha iya.
Hi Lo in namatay kagab-i, Mayo 4 ha Manila. Hiya in 75 anyos.
An taga Las Navas, Northern Samar nga bantuganan nga tagsurat han panhitabo ha showbiz in natawo hadton Abril 21, 1946. Hiya in nakagtapos hin Bachelor of Arts in English ha University of the East.
35 anyos hiya nga nagtrabaho komo tagsurat ngan host hin mga showbiz program ha telebisyon.
Antis hiya nagin editor ha Philippine Star, nagsurat gihapon hiya ha Manila Times, Manila Chronicle, Phillipine Daily Express ngan Variety Magazine. Nagin Co-Host gihapon hiya han “The Buzz” ngan “Startalk.” Hiya an nagsusurat han “Funfare” ha Philippine Star.
Labot la han iya pamilya ngan mga paryente, mga taga-showbiz ngan mga ka-urusa niya ha trabaho, iginkakabido gihapon han iya igkasi Nortehanon an iya pagtalikod hin kadayunan. #
