Isumat.com/Mayo 3, 2021
Ginhahalpat na yana han mga otoridad ha Ormoc City an suspetsado o mga suspetsado nga kumawat han credit card hin usa nga manager hin bangko kun diin nakapamalit na an mga gintatahapan hin mga higamit kantidad hin 176 Mil pesos pinaagi han card.
Subay han police report, an biktima in ginkilala nga hi Mary Ann Dizon, 46 anyos, waray asawa, residente han Brgy San Pablo, Ormoc ngan Branch Manager han BPI-Ormoc.
Nagsumat hi Dizon ha mga imbestigador nga dida han aga han Sabado, Mayo 1, hiya in nanmamalit ha Robinsons Supermarket han mawara an iya pink wallet nga may sulod nga BPI Credit Card, Driver’s Licence, ngan Ormoc QR Code. Ini nga wallet in nakadto han iya bag nga iya iginbutang ha igbaw han cart. Samtang nasasagipo hiya ha panmalit, nakuha na ngay-an han mga gintatahapan an wallet.
Kadagmitan nga gintawagan ni Dizon an bangko basi igpa-sarado an mga transaksyon ha iya credit card. Pero dida han ginpapanginano na ini han bangko, damo na nga salapi an na-iban kay nakapanmalit na an mga suspetsado.
An mga higamit ngan balor han mga napalit amo an masunod – 8 nga cellphones kantidad hin 63, 690 pesos tikang ha duha nga tindahan, mga medical products tikang ha Watsons balor hin 28, 400 pesos, ngan grocery items tikang ha SM Hypermart kantidad hin 28, 400 pesos.
An mga tinubyanan han balaud in padayon pa nga nag-iimbestigar han nasabi nga insidente. #
