Isumat.com/Abril 30, 2021
Dako an pagtoo han 8th Infantry Division-Philippine Army nga magpapadayon pag-alotaga hin pondo an gobyerno para han National Task Force on Ending Local Communist Armed Conflict (NTF-ELCAC) ha masunod nga katu-igan.
Ini in ha atubangan han hulga hin pira nga senador nga deri na popondohan an nasabi nga programa ngan igbalhin nala an pondo ngadto han mga paningkamot pagsurapo han Covid-19.
Ha interview han iFM-RMN Tacloban, hi Maj General Pio Dinoso III, an nagungulo han 8th ID nga nakabase ha Catbalogan City, in nagpabati hin dako nga paglaum nga magpapabilin an nasabi nga pondo labi na an para han Barangay Development Program (BDP) kun diin an mga barangay nga natatalwas ha impluwensya han mga kumunista nga rebelde in nakaka-agom hin tag 20 milyones pesos para hin magkalainlain nga proyekto.
Hi Dinoso in nagsering nga malina-umon hiya nga makakasantop an mga senador nga an pondo in duro nga kinahanglan basi mapadukwag an mga barangay ngan matagamtaman an bastante nga serbisyo han gobyerno.
Pahayag pa han heneral, deri hiya nababaraka kay ha deri maiha nga panahon matutuhay gihapon an deri pagkasinabtanay ha butnga han NTF-ELCAC ngan pira nga senador. Nag-esplikar pa hiya nga deri ini dako nga isyu ngan magkaka-intindihay gihapon an magkaluyo nga panig.
Nag-ugat an isyu han magpahayag in pira nga opisyales han NTF-ELCAC nga may mga kumunista nga nagpapaluyo han community pantries. Ini nga alegasyon in mahugot nga ginsukna han mga senador.
Han yana nga tuig, unom na nga barangay ha Northern Samar an namalonan han BDP Fund, ngan sunod nga tuig, nakatalaan mabahinan in porlomenos 200 pa nga barangay ha Eastern Visayas.
Kadungan hini, gintagan hin duon ni Dinoso nga an problema ha insureksyon in deri masosolbar pinaagi la hin armas ngan aragway, kundi kinahanglan gihapon nga magkaada hin ayuda para han ekonomiya ngan patas nga hustisya para han katawhan. #
