Nakag piyansa na hi Police Lt. Col. Jovie Espinido han unom nga kaso hin homicide nga inaatubang hini may kalabutan han kamatay hin siyam ka tawo nga mga suspetasado nga mga miemro han “Martillo Gang “ han hiya pa an Acting Chief of Police han Ozamis City hadton tuig 2017.
Ha interview haiya han 99.1 RMN Tacloban han programa nga “Straight to the Point” ni Eduard Sanagan iya gin sumat nga 729,000 ngatanan an ira gin piyansa upod na an duha pa nga mga miemro han PNP nga akusado han mao nga mga kaso.
Iya pa gin sumat nga dako nga porsyento han ira gin piyansa in tikang han iya mga taga suporta ha pribado nga sector han siyudad han ozamis ngan Pagadian nga amo an nag aragmot agud la hira ngatanan in maka piyansa tungod nga na deri an iya mga tag suporta nga hiya in ma priso. Bumulig gihapon an local government unit han Ozamis ha pag areglar han ira pag piyansa.
Sumala pa kan Col. Espinido nga hiya pa mismo an nag follow up ha opisina han Department of Justice nga kon kay ano nga waray pa ka reresolbar an ira kaso tikang nga ma ipasaka ini hadton tuig 2018 ngan basi tibway mahibaruan dayon an ka matuoran han mao nga panhitabo.
Gin dig-unan ni Espinido nga lehitimo an ira gin dumara nga operasyon ngan ira gin sunod an mga proseso ha naka talaan unta pag dakop han mga miemro han “martillo gang” kahuman nga mag buhat ini hin kremin nga nag resulta hin pagka pusilay ha butnga han iya grupo ngan ngan han mga gin aalegar nga mga kreminal.
Bisan kon andam hiya nga karawaton kon anuman iton magigin desisyon hiton korte hiton ira kaso, waray malikyi ni Espinido nga mag pabati han iya pag uba ha mga prosecutors nga baga sugad nga an istorya la han mga tag reklamo an gin pamatian ngan waray tagi hin bug-at an ira mga argumento.
