Isumat.com/4:32AM, Pebrero 19, 2021
Ha sulod la hin tulo ka semana, tulo nga magturutdo ha Department of Education ha Tacloban ngan Leyte Division an nagkasisikmit ha illegal drug buy-bust operations han mga tinubyanan han balaud, ug an gibabag-uhi amo an natabo kakulop, Pebrero 18, ha Tacloban City.
Ginkilala an na-aresto nga hi Christopher Hilaria, 34-anyos, residente han Tacloban City, ngan maestro ha Tanauan National High School, Tanauan, Leyte. Hiya in nadakop dida han operasyon ha Picas, Sagkahan District Tacloban han mga operatiba han PDEA-Region 8.
Nagsering an PDEA nga an suspetsado in usa nga High Value Target han ira ahensya. Hapagkayana, an PDEA in naghihimo han eksaminasyon ha ira laboratoryo han droga nga nakumpiskar tikang han suspetsado.
Pira pala ka adlaw an nakalabay, usa nga maestra ha Tacloban City Night High School an na-aresto upod an iya live-in partner ha Abucay, Tacloban tungod gihapon han droga.
Hadton Enero 31, 2021, maestro ha Cirilio Roy Montejo High School ha Tacloban an nasikmit upod in duha pa nga iba dida hin buy-bust operation.
Kun manunumduman, hadton Hulyo han nakalabay nga tuig, mayda gihapon maestro han DepED an na-aresto ha Calubian, Leyte ha alegasyon nga pagbaligya hin illegal nga droga. #
