Isumat.com/12:32PM, Pebrero 18, 2021
Mayda na liwat nahidugang han mga biktima han waray kasosolbar nga mga pamatay ha Sinirangan Bisayas ug an gibabag-uhi nga insidente in natabo ha Calbayog City.
Dida han report tikang ha Samar PNP, natabo an insidente pasado alas 7 han gab-i hadton Martes, Pebrero 16, 2021. Ginkilala an biktima nga hi Michael Alenio, 40 anyos, ngan residente han Brgy Cagmanipes, Tinambacan District, Calbayog.
Hadto nga takna, an biktima an nagbabantay han iya tindahan han tigda la umabot an duha nga suspetsado sakay hin motorsiklo. Ginpa-arakan dayon hin bala an biktima hinungdan han iya kamatay.
Kumalagiw naman dayon an nagbuhat han krimen.
Temprano pa han aga hadto nga adlaw, usa nga empleyado han DENR_CENRO Palo an pinusil ngan namatay ha Brgy Apitong, Tacloban City.
Han Biernes han una nga semana, usa nga pulis nakadestino Leyte Provincial Office an gin-ambush ngan namatay ha Palo, Leyte.
Parehas han natabo nga mga panmatay han nag-agi nga pira ka bulan, ini nga tulo nga bag-o nga insidente in waray gihapon kadakop an mga suspetsado ngan waray natutudlok nga motibo han krimen. #
