Isumat.com/1:03PM, Pebrero 16, 2021
Nagka-urusa an 15 nga mga hurado han Korte Suprema pagpalusad hin desisyon nga ig-dismiss an protesta ha eleksyon kontra kan Bise Presidente Leni Robredo nga iginsalawad ni anay senador Ferdinand “Bongbong” Marcos Jr.
Dida han impormasyon tikang han mga surok ha Korte Suprema, an mga hurado nga nagseserbe komo Presidential Electoral Tribunal (PET) in nagdumara hin En Banc Session yana nga adlaw, Pebrero 16, ngan hira an nagpagawas han desisyon katapos hin sobra upat ka tuig nga lantugi ha korte han magkaluyo nga panig.
Sumala han report han Manila Bulletin, pito nga hurado an umabuyon han ngatanan nga detalye dida han desisyon, samtang an walo in bomotos pag-abuyon han resulta nga amo an pag-dismiss han kaso. Hinungdan hini, nalutaw nga “Unanimous” an desisyon han PET.
Iginpahayag pa han report nga yana nga kulop, pormal ngan opisyal nga igpapasamwak han Korte Suprema ini nga desisyon.
An protesta ni Marcos Jr in nag-aaro ha Korte Suprema nga igdeklarar nga deri ligal an proklamasyon kan Robredo, sugad man an pag-aro nga magkaada hin utro nga pag-ihap han botos ha mga lugar nga gintudlok han nagpoprotesta.
Hira Robredo ngan Bongbong an mahugot nga nagka-atbang ha VP Race han 2016 Elections. Hi Robredo in nagkaada hin abante nga 263, 473 votes kontra kan Marcos Jr dida han resulta han pinili-ay.
Sumala pa han korte, katapos han recount, nadugangan pa an labaw ni Robredo kan Bongbong ngadto hin 278, 566 nga botos.
Hi Robredo amo an running-mate ni anay senador ngan Liberal standtard bearer Mar Roxas nga ginperde ni Presidente Duterte para han pagka-pangulo. Hi Bongbong in dumalagan komo ka-tandem ni anay senadora Miriam Dfensor-Santiago, pero klaro nga ginsuportaran hiya hin damo nga grupo nga naugop kan Duterte bisan kun an iya running-mate hi Allan Peter Cayetano.
Hi Robredo an misis ni hadto anay Naga City Mayor ngan DILG Chief Jessie Robredo nga namatay ha aksidente ha eroplano. Hi Bongbong an junior ni anay Presidente Ferdinand Marcos ug an iya nanay amo hi anay First Lady, anay Leyte ngan Ilocos Congresswoman ngan Governor Imelda Romualdez Marcos.
Tobtob han ginsusurat ini nga notisya, waray pa mga komentaryo tikang han mga kampo nira Marcos Jr ngan Robredo. #
