Isumat.com/1:53PM, Pebrero 5, 2021
Ginsirutan hin kapresuhan nga 6 ngadto hin 8 ka tuig hi anay Barugo, Leyte Mayor Juliana Villasin han Sandiganbayan dida han kaso nga graft kasumpay han anomaliya ha pagpalit hin fertilizer balor hin 1.95 Milyones pesos hadton 2004.
Hadin nag-agi nga adlaw, an 2nd Division han Sandiganbayan nga ginkokomponer nira Justices Michael Musngi, Oscar Herrera ngan Bayani Jacinto in nagka-urusa pagpalusad han 62-ka pahina nga desisyon pag konbiktar kan Villasin. Labot la han kapresuhan, lakip gihapon han patok amo an pagderi kan Villasin nga magkapot hin pwesto ha gobyerno ha maabot nga mga panahon.
An kaso in bumutho dida han reklamo nga waray igpa-agi ha public bidding an pagpalit han fertilizer tikang ha Bals Enterprises. Nagsering pa an korte nga an Bids and Awards Commitee (BAC) han Barugo in waray gihapon pasabta han akusado han desisyon pagpalit han fertilizer.
Igindig-on han mga auditors han gobyerno nga waray natabo nga public bidding ngan waray kunsultasyon ha BAC, sanglit nagawas nga nagparaboot la hi Villasin.
Iginrason han akusado nga nagtalaan hira hin petsa para han bidding, pero waray nag submibter han mga papeles kundi an Bals Enterprises la. Iya pa igindugang nga iya gin-aghat an BAC nga magdumara hin re-bidding pero sugad-sugad nga deri intresado an komitiba.
Hinungdan hini, naghimo hi Villasin hin derekta nga pakigkontrata ngadto han supplier nga igdeliver an nasabi nga fertilizer.
Nagpahayag naman an korte nga supak ha balaud an ginbuhat han akusado kay dida han papeles pag kumbida han mga bidders, nakapatik na an fertilizer nga Fil-ocean brand, ug an Bals Enterprises la an nagkakapot hini nga klase hin fertilizer brand. Hinungdan hini, nagawas nga waray na patas nga oportunidad pag-opreser hin bid an iba nga supplier.
Samtang, acquitted o waray kasal-anan an duha nga gin-akusaran (upod kan Villasin) dida han reklamo. Amo ini hira anay Municipal Agriculturist Reynaldo Bodo ngan anay Municipal Accountant Aluino Ala. An Sandiganbayan in waray makakita hin madig-on nga ebidensya nga maglalambigit kanda Bodo ngan Ala ngadto han transaksyon.
Hira Bodo ngan Ala in nagsering nga waray hira salabutan ngan waray kunsultasyon ha ira mahitungod han direct transacting.
Tobtob han ginsusurat ini nga notisya, an kampo han ex-mayor in waray pa pahayag kun ano an ira magigin aksyon hini nga desisyon han korte. Lakip han puede himoon amo an motion for reconsideration ngan appeal.
Hi Villasin in nagin alkalde han Barugo ha tulo ka termino, tikang han 1998 tobtob 2007. Hiya in waray na kumandidato ha bisan ano nga posisyon tikang matapos an iya siyam ka tuig nga pagin alkalde han bungto.
(Update 7:03PM, Pebrero 5) Hi Ala an iginkahimangraw han Isumat.com yana nga gab-i, ngan iya iginpabati an duro nga kalipayan kay sumala pa ha iya, ha katapus-tapusan “Justice has been served. Thanks and praise God.”
Iya pa igindugang nga magigin magaan na hin duro an iya pamuruboot tungod kay nagin klaro na an kamatuoran nga waray hiya kasaypanan. Hi Ala in usa yana nga Private Practicing Lawyer. Nakapasar hiya han abogasiya samtang hiya pa an Municipal Accountant han Barugo. Kataliwan hadto, bumalhin hiya ha Public Attorneys’ Office ngan paghagos hin pira ka tuig nagdesider nga magin Private Practitioner. Hiya gihapon an Auditor yana han Integrated Bar of the Phils-Leyte Chapter.
Ha luyo nga bahin, hi Bodo in sumulod ha pulitika katapos han iya pagserbe ha LGU-Barugo, Hiya in aada han iya ikatulo nga termino komo konsehal ha bungto han Carigara. #
