Isumat.com/8:39AM, Pebrero 4, 2021
Temporaryo nga igindederi an pangihaw hin baboy ha Palo, Leyte subay han ginpalusad nga kamanduan ni Mayor Anne Petilla.
Sumala han impormasyon tikang han LGU, nagdesisyon hi Petilla paghimo han Executive Order han mayda duha nga baboy an tigda la namatay ha Brgy Salvacion ngan ha Slaughter Unit han bungto.
Lakip gihapon nga igindederi an pamaligya hin karne han baboy didto han bungto. Ini nga kamanduan in epektibo hin usa ka semana, samtang gin-iimbestigar pa an hinungdan han kamatay han duha nga baboy.
Hapagkayana, ginkakabarak-an an padayon nga paglarab han African Swine Flu (ASF) ha probinsya han Leyte. Naha-una na nga ginkumpirmar nga na-apektaran han ASF an kababuyan ha Abuyog, La Paz, Javier ngan Dulag.
Iginreport han Department of Agriculture Region 8 nga haros 700 na nga kababuyan an pinanmatay nala basi deri na maghaluag pa an mga lugar nga madadarahigan han ASF. Iginsaad han mga LGU nga apektado nga babaydan an mga tag-iya han baboy nga na-alakbatan han virus. An DA in maghahatag gihapon hin counterpart financial assistance.
Ha luyo nga bahin, igindig-on naman ni Mayor Ofel Alcantara han Tolosa, Leyte nga waray pa na monitor nga ASF nga kaso ha ira bungto. Mayda man gud namatay nga baboy didto hin usa nga barangay ha Tolosa, sanglit nagkaada hin mga sumat-sumat mahitungod han ASF ha ira munisipalidad.
Igin-esplikar ni Alcantara nga an rason han kamatay han baboy in nahilo-an ini tungod kay an igintubong in mapan-os na nga bontol o sagmaw subay han eksaminasyon han mga eksperto. #
