Isumat.com/6:03AM, Pebrero 4, 2021

Katapos hin unom ka tuig nga pagtinago, nasikmit han mga otoridad ha Cabucgayan, Biliran an suspetsado pagpatay hin usa nga kapitan del barangay ha Toledo City, Cebu.

Dida han impormasyon tikang ha Biliran PNP Provincial Office, hi Dionesio Juarez, alias Dioning, 55 anyos, an gin-aresto han kapulisan subay han Arrest Warrant ha kaso nga murder nga ginpagawas han RTC-Branch 29 ha Toledo City, Cebu. Gin-akusaran hi Juarez hin pagpatay kan Timoteo Largo, Brgy Chairman han Cambang-ug han nasabi nga syudad unom na ka tuig an nakalabay.

Sumala pa han report, hinsabutan nga an akusado in pira na ka tuig nga nag-uukoy upod an iya live-in partner ha Brgy Balaquid, Cabucgayan, Biliran kun diin hiya in gin-aresto hadton Enero 27.

Dida han record han korte, hi Brgy Kapitan Largo upod an iya oyab in sakay hin usa nga kotse hadto nga takna ngan nagbibiyahe hira ha Brgy Ilihal, Toledo City. Ginbalabgan an ira agi-anan hin multicab kun diin sakay hi Juarez. Humaw-as an akusado ha multicab, ginda-op an biktima ngan ginpusil hin M-16 rifle hinungdan han iya kamatay.

Hi Juarez in iginbalhin na tikang ha Cabucgayan PNP ngadto ha Toledo City basi atubangan an kaso kontra ha iya. Waray iginrekomendar nga piyansa an korte ha iya kaso.

Ha iba naman nga notisya, arestado an ika-6 nga Most Wanted Man ha probinsya han Leyte ha Pastrana, Leyte hadton Pebrero 1, 2021.

Hi Rextan Morbos, in gindakop han mga otoridad ha Brgy Manaybanay, Pastrana, Leyte tungod han kaso nga rape o paglugos. Nagpalusad hin mandamiento de arresto an RTC-Branch 7 Tacloban basi madakop an akusado.

Hi Morbos an gintutudlok nga 6th Most Wanted ha Leyte ngan waray gihapon magrekomendar hin piyansa an hukmanan. #