Isumat.com/8:51AM, Enero 6, 2021
Habubo hin duro an ihap han katawhan ha Sinirangan Bisayas nga nagpa-rehistro ha COMELEC para han pinili-ay ha 2022.
Dida han pakighimangraw kan Region 8 Comelec Director Atty Jose Nick Mendros, iya ginpahayag an pag-iliw han kwalipikado nga mga botante nga magpa-rehistro ha ira ahensya. Sumala kan Mendros, tikang han Setyembre 1 tobtob Disyembre 29, 2020, sobra pala hin 32 Mil katawo an pumakadto ha ira ahensya para han pagpalista.
Ini nga ihap in habubo hin duro han ginbabanabana nga maabot hin 350 Mil katawo ha Region 8 nga dapat unta magpa-rehistro komo bag-o nga botante o mag-re-activate han ira pagigin botante.
Kasumpay hini, utro nanginyupo an opisyal ha publiko nga deri na magruhaduha pagkadto han ira mga opisina basi makagrehistro labi na nga tobtob nala Setyembre 30, 2021 an rehistrasyon.
Iginsumat ni Mendros nga an mga opisina han COMELEC in abri alas 8 han aga tobtob alas 3 ha kulop, Lunes tobtob Huwebes. Kun matumanan nga holiday o fiesta oficial, abri gihapon an COMELEC basta Lunes tobtob Huebes. Waray naman rehistrasyon kun Biernes, Sabado ngan Domingo.
An 32 Mil nga nagpalista in ginlalakipan han bag-o o syahan pala nga mabotos; mga nagpa-reactivate; nagbag-o hin personal nga mga impormasyon; ngan pagbalhin hin presinto.
Ginsasagdunan ni Mendros an mapakadto ha ira buhatan nga magdara hin PSA Birth Certificate (para han mga batan-on nga syahan pala nga mabotos), ngan Valid Identification Card.
Puede gihapon mag fill-out han registration form ha internet website han COMELEC ngan ig-print ini. Dad-on ngadto ha COMELEC an dokumento basi deri maglangan an transaksyon, sering pa ni Mendros.
Ginklaro pa ni Mendros nga apektado han Covid Pandemic an panrehistro tungod han mga travel restrictions ngan lockdowns ha magkalainlain nga mga LGUs. Pero iya igindig-on nga deri angay maka-ulang an kagaw ha pagparehistro, an importante magsunod la han health protocols kun mapakadto ha COMELEC. #
