Isumat.com/9:30AM, December 31, 2020
Ha atubangan han pahimatngon han mga otoridad nga namimintana an peligro han Covid ha Rehiyon Otso ha pagtapo han 2021, sugad-sugad nga waray labot an kadam-an nga katawhan hini nga sitwasyon kay ginma-urog lugod an pagkatitirok, pag-inirignom, pagdumara hin party ngan igindederi nga mga aktibidad.
Subay han assesment han World Health Organization (WHO), aada na yana ha High Risk an sitwasyon ha Eastern Visayas. Sumala han DILG, ini in dara kay han nag-agi nga duha ka semana (Disyembre 16-30) haros 1,300 an nahidugang nga bag-o nga nagkatatapnan han virus han rehiyon. Dida hini nga panahon, nalutaw nga an Eastern Visayas in nakagbuhos hin haros 25 porsyento han kanan bug-os nga Pilipinas nga mga bag-o nga nagpositibo.
Nagpabati na hin kabaraka an DOH Regional Office nga kun magpadayon ini nga trend, magkukulang na an mga hospital beds para han Covid Patients ha aton dapit.
Dida han gibabag-uhi nga Covid Update han DOH yana nga petsa (Disyembre 31) mayda bag-o nga 146 nga nagpositibo, sanglit umabot na ha 11,292 an Total Cases. Aada naman ha 90 porsyento an naka-recover (10,199).
An kabug-usan nga Covid-Related Deaths ha pagtapos han tuig in 129 katawo, samtang an Active Cases in nahipatik ha 694.
Ha pagsulod pala han Disyembre, na obserbaran na an wala too nga mga karisyuhan ha beach, mga resorts, mga panimalay, mga restobars, ngan iba pa nga mga lugar. Sugad-sugad nga an alimpatakan han tawo in nagsesering nga deri makakabalabag an Covid ha pagrisyo ngan katitirok.
An mga Health Personnel ngan Contact Tracers in nagpabati han ira kagul-anan ngan kabidu-an nga waray pagpa-id in kadam-an nga katawhan han nagtitikadelikado nga sitwasyon yana. Ha pag-entra han 2021, nalulukupan hin kadelikaduhan an Eastern Visayas.
Naninimaho na ba an istrikto nga LOCKDOWN katapos han pagselebrar han New Year? ? ?
