Isumat.com/8:54AM, December 28, 2020
Maatubang hin kaso an mga grupo o indibiduwal nga maghahatag hin suporta ha mga rebelde nga New Peoples Army, sumala kan MGeneral Pio Dinoso III, Commanding General han kanan Philippine Army 8th Infantry Division nga nakabase ha Catbalogan, Samar.
Dida han interview han iFM-RMN Tacloban, hi Dinoso in nag-warning ha ngatanan nga nagin mahugot na yana an patakaran han gobyerno ha ilarum han Anti-Terrorism Law labi na nga gintudlok an CPP-NPA nga terorista nga hugpo dida hini nga balaud.
Sumala kan Dinoso, an hin-o man nga mapapamatud-an nga naghahatag hin bisan ano nga klase hin suporta ha kumunista nga kagi-usan in sasampaan hin kaso.
Pero ginklaro han heneral nga an mga indibiduwal o grupo nga ginkokotongan ngan gintatarhog han mga rebelde in kinahanglan makigsumpayan ha militar basi makaghimo hira han kaangayan nga aksyon para maproteksyunan hira. Sering pa niya, kun mayda na proteksyon tikang ha militar, waray na rason an hin-o man nga maghatag hin salapi ha mga rebelde.
Kun magpadayon paghatag hin ayuda ha NPA an bisan hin-o bisan kun protektado na hira han militar, waray na mahihimo an gobyerno kundi an pagsalawad hin kaso han mga nahatag hin suporta.
Napipiritan la an mga kontraktor, negosyante, ngan pira nga pulitiko paghatag hin salapi tungod han kahadlok han mga tarhog han mga kumunista, pahayag pa ni Dinoso.
Ginsagdunan gihapon han Commanding General an mga LGUs nga deri dayon magpahugay hin pira nga mga Non-Government Organizations nga nag-aaro hin bulig kay an iba hini in mga “Front Organizations” la han CPP-NPA. Sumala ha iya, angay nga seghuraduhon han mga LGUs kun lehitimo an nasabi nga mga organisasyon.
Iginbuyagyag gihapon ni Dinoso nga an binilyon-bilyon pesos nga kantidad han mga programa ha ilarum han ELCAC (Ending Local Communist Armed Conflict) in derekta nga naaguman han mga baryuhanon pinaagi hin mga proyekto. Ini an hinungdan nga mahugot an pagtipa han NPA hini nga programa kay magdudurot ini hin kauswagan ha tay-aw nga mga lugar.
Gindayaw gihapon han heneral an pwersa armada ha Rehiyon Otso dara han malinangpuson nga kampanya kontra han insurhensiya kun diin kadam-an nga mga rebelde in sumurender na ngan an iba naman in nagkadadakop ngan nagkamamatay ha mga enkwentro kontra han mga tropa han gobyerno. #
