Isumat.com/5:09AM, December 28, 2020
Bumalik ha piyod han gobyerno in usa nga lider ngan duha nga miembro han New Peoples Army.
Subay han report tikang ha PNP Regional Office, sumurender ha 1st Leyte Provincial Mobile Force Company hira Ka Joseph, anay Commanding Officer han Regional Unified Command ngan Regional Guerilla Unit ha ilarum han Efren Martinez Command han NPA; sugad man hira Ka Jay ngan Ka Mateo, ngaduha miembro han Buhawi Platoon-Militia ng Bayan, Amandawin Command.
An tulo nga anay kaapi han rebelde nga kagi-usan an iginpresentar ha media ni BGen Rolando de Jesus, PNP Regional Director, hadin Disyembre 26 nga amo an petsa han anibersaryo han CPP-NPA.
Nagpahayag pa an PNP nga hi Ka Joseph in nagin squad ngan platoon leader hadto han Hamomoong Front Guerilla Unit, Finance Officer ngan Medic han Banog Platoon Guerilla Unit.
Igintubyan gihapon nira ha mga otoridad in usa nga shotgun, tulo nga revolvers, usa nga kalibre .45, tulo nga rifle grenades ngan kadam-an nga mga bala.
Hi De Jesus in utro naman nga nanawagan ha mga rebelde nga bumalik na ha panig han gobyerno ngan makatagamtam han mga programa ngan benefecio para han ira mahimyang nga panginabuhi upod han katilingban. #
