Isumat.com/10:45AM, December 17, 2020
Kun igtatanding ha iba nga alkalde, mas nahamumutang ha peligro an panlawas ngan kinabuhi ni Mayor Roland “Boie” Evardone han Arteche, Eastern Samar.
Labot la han iya pagdumara han bungto komo Chief Executive, kaapi gihapon hiya han grupo nga nakuha han swab samples tikang han mga mulopyo nga nahilalakip han contact tracing kun may nagpopositibo han Covid-19 ha ira lugar.
An batan-on nga Mayor in usa nga Registered Nurse, sanglit waray hiya magruhaduha nga umapi dida han nasabi nga aktibidad. Sering pa man niya, usa hiya nga nanumpa nga magtitimangno han panlawas han tawo komo Nurse, sanglit iya ginbubuhat an angay himoon hin usa nga Nurse.
Ha Rehiyon Otso, upat na nga Mayor an natapnan han virus.
Hi Evardone in aada yana ha syahan nga termino komo alkalde han bungto. Antis pa an pandemya, naglunsad na hiya hin mga programa ha Arteche labi na an kaparte han pagpanalipod han kalibungan ngan pagderi pagsigarilyo ha bungto nga iya nasasakupan.
Hi Mayor Boie in umangkon ni Eastern Samar Governor Ben Evardone. Hi Gov Evardone, ha luyo nga bahin, in nagpatapod nga an Provincial Government in mapalit han bakuna kontra Covid ngan libre ini nga igpapahi-agom ngadto han mga Estehanon.
Hapagkayana, haros umabot na ha 650 an Total Cases ha Eastern Samar ngan sobra 60 an Active Cases. An naka-recover aada na ha 553, samtang 12 an Covid Patients an namatay. #
