Isumat.com/9:13AM, December 17, 2020
Waray pa ngani usa ka semana an nag-agi tikang mamatay in usa nga pulis ha panggama han New Peoples Army ha Marabut, Samar, mayda na liwat natabo nga ambush binuhatan han mga rebelde nga kumunista ha Matuguinao, Samar kun diin usa nga sundalo an naawat an kinabuhi.
Sumala han report, pira nga tropa han Philippine Army in naalog unta hin tubig ha usa nga salog ha Brgy Carolina, Matuguinao han gamaan hira han mga rebelde. Namatay dida han insidente hi PFC Ronel Manusa ngan nasamaran an tulo niya nga kaupdanan.
Nagpahayag an Philppine Army nga an mga kasundaluhan in kaapi han Community Support Program nga naghahatag hin serbisyo ha mga baryuhanon han pagsulungon han walhon nga grupo.
Pira pala ka adlaw an nakalabay, usa nga pulis an namatay han magdumara hin ambush an mga rebelde nga kumunista ha Brgy Logero, Marabut. Naigo gihapon hin bala an usa nga preso nga sakay han Patrol Car.
Ha iba naman nga panhitabo, ginpanmumusil ngan pinatay an traffic enforcer nga hi Mario Ilao didto ha Brgy 10, Catbalogan City, kakulop han aga.
An 45-anyos nga biktima in miembro han kanan syudad Law Enforcement Auxiliary Unit. Hiya in tikadto na unta ha trabaho han gamaan hiya hin upat nga suspetsado ha atubangan han barangay hall didto han nasabi nga lugar.
An upat nga suspetsado in sakay hin motorsiklo ngan pick-up nga sarakyan. #
