Isumat.com/8:19AM, December 16, 2020
Sapin-sapin nga mga kaso an aatubangon hin usa nga Barangay Chairman han ma-aresto hiya han mga tinubyanan han balaud tungod han pagbaligya hin iligal nga droga ha Hinunangan, Southern Leyte.
An suspetsado in ginkilala nga hi Edward Almine, 52-anyos, residente ngan kapitan han Brgy Talisay kun diin hiya nadakop.
An mga operatiba han Southern Leyte PNP Drug Enfocement Unit ngan PDEA-Southern Leyte an nagdumara han operasyon ngan nakapalit hin pira ka sachet hin gin-aalegar nga shabu tikang han suspetsado nga ginkokonsiderar komo High Value Target.
Labot han mga kaso ha pagtalapas han balaud kontra iligal nga droga, papasakaan gihapon hi Almine hin kaso administratibo tungod kay opisyal man hiya han barangay.
Samtang ha iba nga operasyon, nadakop an gintatahapan nga pusher hin illegal drugs ha Brgy San Roque, Alangalang, Leyte hadton Disyembre 13, 2020.
An suspetsado nga hi Dennis Lino Salvania, 43-anyos in nakuha-an hin unom ka sachet han gintotoohan nga shabu. Hinsabutan gihapon nga ha deri pala maiha nakagawas ha rehabilitation center hi Salvania tungod han paghidabi hadto han iligal nga aktibidad.
Tungod hini, utro hiya nga mapapaslak ha karsel ngan maatubang hin bag-o nga mga kaso. #
