Isumat.com/1:32PM, December 2, 2020
Upat ka tawo an naawat an kinabuhi, kadam-an nga iba pa an nagkaada hin karamtan ha lawas ngan nagkadadanyos nga mga sarakyan dida hin magkalainlain nga aksidente ha kadalanan ha syahan nga adlaw ha bulan han kapaskuhan, Disyembre 1, 2020.
Ha Liloan, Southern Leyte, kamatayon an dinangatan hin tulo nga mga ulitawohay han bangga-on hin Montero Sport Vehicle an ira sinasakyan nga motorsiklo pasado alas 8 han gab-i ha National Highway, Brgy Poblacion.
Duha han mga biktima in 17-anyos, samtang an usa in 15-anyos. An ira motorsiklo in tikadto ha town proper han igkasampakay hira han awto nga ginmamaneho-an ni Judy Maamo nga tikadto na unta ha St Bernard. Subay han police blotter, nawarayan kontrol han manibela hi Maamo ngan iya nabunggo ha kaluyo nga lane han kalsada an motorsiklo.
Dead on the Spot an tulo nga kalalakin-an, samtang gindara ha hospital hi Maamo basi tambalon ha karamtan nga iya gin-antos.
Samtang, usa naman nga sundalo an namatay han magbanggaay an iya motorsiklo ngan usa gihapon nga motorsiklo ha Brgy Calsadahay, Burauen Leyte, pasado alas 5 han kulop, Disyembre 1.
Namatay hi Pvt 1Class Ronald Anota nga kaapi han 14th Infantry Battalion han Philippine Army. Nagkaada naman hin mga injuries ngan gindara ha hospital an sakay han lain nga motor nga ginkilala nga hira Marvin Daclan, Maricel Bansale, Sania Daclan ngan Samantha Daclan.
Ha usa pa nga panhitabo ha Burauen hadto liwat nga adlaw, duha nga single motorcycle an nagpurok ha eskina han San Agustin ngan San Joaquin nga mga kalsada, Brgy District II, alas 2 han kulop.
An mga driver han motorsiklo nga hira Nelson Cedenia ngan Roger Tismo in nagkapapanggusan ha lawas ngan nakatalwas han panhitabo.
Didto naman ha Alangalang, Leyte, nagkaada hin karamtan ha lawas an drayber hin motorsiklo han sumemplang hiya katapos nga makatudol hin tawo nga natalabok han kalsada ha Brgy Cabadsan, alas 1:30 han kulop.
An suspetsado nga nakatudol in ginkilala nga hi Dominic Sicoy, 34-anyos, maestro ngan residente han nasabi nga barangay. An natudol amo naman in 8-anyos nga Grade 2 Pupil nga ka-barangay la gihapon ni Sicoy.
Ha iba nga panhitabo, an patrol car han Pambujan, Northern Samar PNP in nakabangga hin karabaw pasado alas 8 han gab-i ha Brgy Dale, San Roque, Northern Samar.
Ha panguna ni Police Lt. Juditho Galit, nagdudumara hin Intel Operation an iya grupo hadto nga takna han tigda la tumalabok an karabaw ha kalsada. Nagkaada hin danyos an patrol car, pero waray naman nadarahigan han mga pulis nga sakay hini.
Ha Tacloban City naman, 14 nga behikulo an nagkarambola ha Brgy 36, Sabang District, harani han tulay ha Leyte Progressive High School. An ugat han panhitabo kay nawarayan preno an trak nga nalusok tikang han hitaas nga parte han kalsada tikang ha Robinsons North tikadto ha Sabang.
Hinungdan hini, nahidabi in kadam-an nga behikulo lakip na an Police Car han PNP Regional Office, pribado nga mga behikulo, motorsiklo ngan iba pa. Natabo ini alas 4:45 han kulop.
An drayber han trak ngahi Daniel Bulan in nagsering nga nawarayan preno an iya sarakyan. An tag-iya han trak nga hi Mario Rodrigo in nagsaad nga iya babatunon an kagarastusan ha hospital han mga nanhidabi ngan paghingayad han mga nadistroso nga sarakyan.
Tobtob han ginsusurat ini nga notisya, unom na nga tag-iya han iba nga sarakyan an nakig-areglo han tag-iya han trak. An mga nagkaada hin injuries in gindara ha pribado nga hospital ngan ha Eastern Visayas Regional Medical Center. #
