Isumat.com/8:03AM, December 2, 2020
Iiliwon an karanta han kabataan ha atubangan han mga balay ngan deri mahahatag an gin-andam nga mga sensilyo para han nanmamasko tungod han pagderi han “Face to Face Caroling” ha Tacloban City.
Deri puede an pangaroling hin grupo o bisan nag-uusaan la, subay han kamanduan.
Lakip gihapon nga deri igintutugot han Executive Order 2020-11-044 an pagdumara hin Face to Face Christmas Party o bisan ano nga klase hin katitirok ha bug-os nga bulan han Disyembre.
An kamanduan nga ginpirmahan ni Mayor Alfred Romualdez in nasusubay han pagdeklarar han National Task Force on Covid-19 nga igpabilin an Tacloban City ha General Community Quarantine tobtob han katapos han 2020.
Gintagan hin duon han City Government nga kinahanglan ini nga aksyon basi kapugngan an pagasarang han ginkakahadlukan nga kagaw. Tobtob han Disyembre 1, umabot na ha 1056 an Total Cases han syudad kun diin 1003 an naka-recover na. Mayda 16 nga Covid Patients an namatay ngan mayda pa 37 nga Active Cases.
Padayon gihapon an pagderi nga gumawas han balay an nag-eedad hin menos 15 anyos ngan lapos hin 65 anyos, labot la kun duro ka importante an rason.
An mga aktibidadis ha Singbahan in gintutugutan ha kondisyon nga deri malapos ha 30 porsyento han kapasidad an matambong nga katawhan.
Gintutugutan gihapon an pagbiyahe tigawas ngan tisulod han syudad basta deri la pagli-aw libang an hinungdan. #
