Isumat.com/7:30AM, November 18, 2020
Ha sulod la hin upat ka bulan, duha ka beses nga may pag-eskapo hin mga preso ha Sub-Provincial Jail ha Calbayog City, Samar…..ngan dida hini nga mga panhitabo, pirmi tubig an rason han pakakapuga.
Hadin nag-agi nga adlaw, an preso nga hi Jerry Dealagdon, alias Joan/Bonong, 35 anyos, taga Sta Margarita, Samar amo an naka-ikyas tungod kay ginpa-alog hin tubig gawas han karsel. Subay han impormasyon, tungod han kawaray suplay han tubig, tulo nga preso an gintugutan pag-alog han naka-duty nga hi Jail Guard Amando Santiago, pero hi Dealagdon in waray na bumalik.
Hapagkayana, an mga otoridad in nagbubuhat hin paghalpat han preso nga naatubang hin mga kaso nga Murder, Frustrated Murder ngan Attempted Murder.
Hadin Hulyo, duha nga preso an namatay ngan an iba nagkadadakop han magkaada hin jailbreak didto han mao nga bilanggu-an kun diin walo an naka-eskapo. An rason: tubig gihapon.
Hadto nga takna, nagdeliver hin tubig ngadto han karsel ngan nakatyempo an mga preso hin pagpuga tungod kay nasagipo an mga gwardya pag-areglar pagpasulod han behikulo nga nagdedeliver han tubig.
Nagdumara hin paglanat an mga otoridad han karsel ngan mayda namatay nga pugante han waray hira sumurender bisan kun ginwarningan na hira. Mayda iba nga nagkadadakop ngan nahibalik ha presuhan, samtang duha pa an ginpipinamiling.
Ginlaknit ha pwesto an nangungulo han mao nga presuhan samtang gindudumara an imbestigasyon hadto nga insidente. #
