Isumat.com/7:43AM, November 12, 2020
Waray iba nga magbibinuligay kundi kita la ngahaw nga mga igkasi Pilipino – ini an inspirasyon nga naghadi ha kasingkasing han mga Guiuananon dida han ira pagpadara hin ayuda ha mga biktima han nagsunod-sunod nga bagyo ha Bicol Region.
An bungto han Guiuan, Eastern Samar in bantuganan nga usa han mga lugar ha Rehiyon Otso nga hamurasak an isda sanglit damo liwat an produkto han “Bulad” didto. Ngan ini nga ira produkto an simbolo han gugma para han mga igkasi Pilipino nga nadarahigan han kalamidad.
An LGU-Guiuan ha panguna ni Mayor Annaliza Gonzales-Kwan in nagpasabot nga maghahatag hin 100 Mil pesos kantidad hin bulad an bungto para han mga biktima han bagyo ha Bicol. Sering pa man han alkalde, maupay ini ighatag kay dako an mabubulig hini ha pagkaon, imbes nga deri lugod mapalit tungod han mga lockdown nga iginpapasunod yana ha Eastern Samar.
Hi Gonzales-Kwan in nagsumat nga hadton bagyo Yolanda, an Bicol Emergency Response Team an usa han mga hugpo nga bumulig basi makatindog an Guiuan nga ginlatigo han Super-Typhoon hadton 2013.
Ini nga pitad han LGU in komo pagbalos ngan pagpa-abat hin gugma ngadto han mga Bicolano nga waray magruhaduha pag-ayuda han mga Guiuananon.
Kadam-an gihapon nga mga sektor ha Rehiyon Otso in nagpadangat hin magkalainlain nga hinabang ngadto ha Bicol Region. #
