Isumat.com/10:32AM, November 6, 2020
An municipalidad han Palapag ug an probinsya han Northern Samar in aada yana ha panahon han kabidu-an tungod han pagtalikod ha kadayunan han alkalde han bungto nga hi Mayor Manuel Aoyang.
An 66-anyos nga alkalde in namatay Nobyembre 6 han maagahon ha usa nga pribado nga hospital ha Tacloban City. Hi Oayang nga kilalado ha agnay nga “Gawi” ha iya bungto in nagseserbe han iya ikatulo nga termino komo amay han Palapag.
Hi Aoyang in gindara ha hospital hadton Oktubre 27 ngan paghagos hin duha ka adlaw, positibo ha Covid-19 an resulta han iya swab test. An patay nga lawas han alkalde in iginbalik dayon ha iya bungto ngan kadagmitan iginlubong yana nga aga komo pagsunod han mga patakaran yana nga panahon han pandemya.
Subay pa han impormasyon, maliwan komo alkalde han Palapag hi Bise-Mayor Marlon Agno. Hapagkayana, mayda sobra 30 nga kaso hin Covid didto han mao nga bungto.
Nagpapadayon an paglobo han mga kaso han virus ha Northern Samar. Sumala han gibabag-uhi nga report han Provincial Health Office, sobra na 800 an natapnan didto han probinsya ngan hapagkayana, 399 an aktibo nga kaso. Siyam naman nga Covid Patients an naawat an kinabuhi. #
