Isumat.com/7:31AM, October 27, 2020
“Ayaw na kamo paghulat han deadline, pagparehistro na samtang temprano pa.” Ini an utro nga panawagan ni Atty Nick Mendros, Regional Director han Commission on Elections ha Eastern Visayas.
Dida han iya pahayag ha iFM-RMN Tacloban Oktubre 26, hi Mendros in utro nanginyupo ha kwalipikado nga mga botante nga singabuton an panahon nga deri pa nagbubugi-ot ha mga buhatan han Comelec. Sering han opisyal kinahanglan deri na maghulat han Setyembre 30, 2021 nga deadline kay bangin lugod deri na ma-akomodar tungod han kawaray na oras.
Iginpahayag ni Mendros nga porlomnos 16, 600 pala an nag pa-rehistro denhi ha Sinirangan Bisayas tikang han Setyembre 1 tobtob Oktubre 17, 2020. Dida hini nga ihap, sobra 6 Mil an bag-o nga mga botante, samtang an iba an nagpa-activate, nagbalhin hin presinto ngan mayda mga pagbag-o ha personal nga impormasyon.
An opisyal in nagpahayag pa nga deri gud nakakabulyo hin pagparehistro an iba tungod han kahadlok nga magkagawas dara han pandemya. Pero iginpasarig niya nga istrikto an ira pagpatuman han Health Protocols ha Comelec basi kalikyan an pagitapon-tapon han mga nagpaparehistro.
Partikular nga gintudlok ni Mendros an Calbayog ngan Sta Margarita ha Samar, ngan Gamay, Northern Samar nga nasuspender an panrehistro tungod han gin-implementar nga lockdown.
Nag-anunsyo gihapon hi Mendros hin pagbag-o han schedule han panrehistro. Tinikangan hiton Nobyembre 2020, an pagpalista in Lunes tobtob Biernes, alas 8 han aga tobtob alas 3 han kulop. An schedule nga Martes tobtob Sabado in yana nala nga Oktubre.
Ini nga panrehistro in panagndaman han ahensya para han tiarabot nga pinili-ay Nasyunal ngan Lokal hiton Mayo 2022. #
