Isumat.com/8:02AM, October 24, 2020
Tungod han reklamo han lehitimo nga mga dentista, usa nga peke nga dentista an gin-aresto han kapulisan ha Tacloban City.
Ginkilala an suspetsado nga hi Romnick Macariola, 28 anyos, residente han Bliss 3, Brgy 74, Nulatula, Tacloban City. Hiya in na-aresto han mga operatiba han CIDG-Leyte didmo mismo han iya panimalay han nag-agi nga adlaw.
Subay han pahayag han CIDG, an Philippine Dental Association-Leyte Chapter in nagpadangat hin reklamo ha ira buhatan kasumpay hin pira nga indibiduwal denhi ha Tacloban ngan Leyte nga nagtatrabaho o nagpapakabuhi komo dentista bisan kun deri hira tinood nga dentista.
Dara hini, naghimo hin entrapment operation an mga otoridad ngan na-aktuhan nira hi Macariola nga nagtata-od hin pustiso ngadto han pasyente nga kakuntsaba han kapulisan.
Nakuha tikang han suspetsado an boodle money nga gingamit han transaksyon, ngan mga dental ngan medical equipment.
An suspetsado in papasakaan hin kaso ha pakasupak han Republika Acta 9484 tungod han iya iligal nga pagpraktis komo doktor. #
