Isumat.com/7:23AM, October 20, 2020
Mahugot yana an contact tracing han mga otoridad ha Albuera, Leyte basi matudlok an mga tawo nga posible iginkahibalag han Covid Patient nga naka-ikyas ha Isolation Unit han bungto.
Subay han report han LGU-Albuera, dida han Oktubre 16, gumawas nga positibo ha Covid-19 an resulta han swab test han babaye nga Locally Stranded Individual (LSI). Dida mismo hito nga adlaw, ginsumatan an babaye han iya sitwasyon. Pagakagab-i, umiskapo an nasabi nga LSI upod an iya live-in partner tikang han Isolation Center ha Brgy Antipolo.
Ginhalpat dayon han mga personales han LGU an duha ngan nadakop hira pira ka oras an nakalabay tikang han ira pagpuga ngan iginbalik ha Isoilation Unit.
Kasumpay hini, gin-aandam na yana han LGU an mga kaso nga igfsasampa kontra han LSI ug an iya live-in partner.
Samtang, haros 6 Mil na na an mga kaso han Covid ha Eastern Visayas. Nadugangan ini hin 77 kakulop sanglit an Total Cases han rehiyon in umabot na ha 5,893. Aada naman ha 5,039 (85%) an naka-recover. An mga Covid Patients nga naawat an kinabuhi in 55 na katapos la nga tumalikod ha kadayunan an taga Palo, Leyte nga 68-anyos nga pasyente hadton Oktubre 17. An mga Active Cases hapagkayana in 799. #
