Isumat.com/8:29AM, October 9, 2020
Namatay an usa nga preso han pagpokpokon hiya ha ulo han iya igkasi-preso ha Burauen District Jail, Burauen, Leyte hadin nakalabay nga adlaw.
An biktima in ginkilala ngahi Pablito Briton, 60-anyos, residente han Brgy Esperanza ngan may kaso nga pagtalapas han Comelec Election Code. Ginkilala naman an suspetsado ngahi Edgar Avila, 44-anyos, taga Brgy Limburan ngan may kaso nga frustrated murder.
Dida han imbestigasyon, nalutaw nga personal nga away an rason kun kay-ano nga ginmalmalan ha ulo ni Avila hi Briton nga nagin hinungdan han kamatay han biktima.
Ha iba naman nga panhitabo, nahibalik ha karsel an preso nga nakapuga tikang ha Lock-Up Jail han Caibiran, Biliran PNP Office.
An 43-anyos nga hi Jaime Bacarisas nga taga Brgy Cabibihan, in naka-ikyas tikang han iya bantay han tugutan hiya nga gumawas ha selda basi magpasirak.
Nagdumara naman dayon hin operasyon an PNP han mao nga bungto ngan nasikop hi Bacarisas ha Brgy Victory han mao la gihapon nga munisipalidad.
Hi Bacarisas in naatubang han kaso nga pakatalapas han RA 9262 (Violence Against Women and Children.) #
