Isumat.com/8:53AM, October 6, 2020
Nalaprak ha mga kamot han New Peoples Army an mga Improvised Explosive Device (IED) nga ginhihimo ha mga pabrika hin bomba ha Brgy Burabod, San Antonio, Northern Samar.
Ha usa nga panmaki-ana han iFM-RMN Tacloban, iginbuyagyag ni Northern Samar PNP Director Col Arnel Apod nga nakaka-angkat an rebelde nga kumunista tikang han taghimo hini nga mga bomba ha isla nga bungto han San Antonio.
Sering pa ni Apod, dako an posibilidad nga ini nga mga bomba in ginagamit han NPA ha pan-ambush han kapulisan ngan kasundaluhan.
Labot la han NPA, nakakapalit gihapon hini nga mga ekipahe an mga naghihimo hin iligal nga paagi hin pangisda sugad han pagdinamita.
Nagsumat pa an opisyal nga an Eastern Visayas ngan Bicol Region an ginsusuplayan han produkto hini nga mga pabrika.
Dida han imbestigasyon, nasabtan han mga otoridad nga tikang ha Cebu an mga materyales nga gingagamit paghimo han mga bomba.
Hadin nag-agi nga pira ka semana, minilyon-milyon pesos nga kantidad hin mga higamit paghimo hin bomba ngan dinamita didto hini nga kabubkiran nga parte han isla nga munisipalidad. #
