Isumat.com/6:43AM, October 2, 2020
Waray tupong nga kalipayan an gin-abat han pamilya hin usa nga baby han maka-recover hiya tikang han Covid-19 dida mismo han petsa han iya syahan nga birthday.
Sumala han impormasyon tikang ha Babatngon Updates, an DOH Regional Office an nag-anunsyo nga naka-talwas an bata kakulop, Oktubre 1, nga iginkatuman han pagtigaman han iya syahan nga kaadlawan.
An bata nga taga Brgy Pagsulhugon, Babatngon, Leyte in lakip dida han 89 nga Covid Patients nga nagpaka-recover hadto nga petsa.
Ha atubangan naman hini nga maupay nga notisya, mayda liwat makabirido nga impormasyon kay nadugangan hin tulo an nagkamamatay nga pasyente han Covid. Dara hini, aada na ha 45 katawo ha Eastern Visayas nga natapnan han virus an naawat an kinabuhi.
An mga namatay nga Covid Patients han rehiyon in .94% han mga nagpositibo.
Ha bug-os nga rehiyon, umabot na ha 4,795 an nagpositibo han virus han madugangan ini hin 80 kakulop. An mga naka-recover in aada na 4,085 (85%).
Samtang, gin-aprobaran han Regional Task Force an hangyo han probinsya han Samar nga temporaryo pagpa-undang han panguli han mga Locally Stranded Individuals ngan Returning Residents.
An Task Force in nagpagawas hin kamanduan nga deri puede makabalik ha Samar an mga LSI epiktibo Setyembre 30 tobtob Oktubre 14, 2020.
An lalawigan in mayda na 1,684 katawo nga natapnan. Ini nga ihap an gidadamu-i nga nagpositibo ha mga probinsya han Eastern Visayas. Nasunod an Leyte nga mayda 1,586 nga nagpositibo han kagaw. #
