Isumat.com/2:32PM, September 03, 2020
Mabidoon nga iginpasamwak han LGU-Basey, Samar nga binawi-an hin kinabuhi an usa nga mulopyo han bungto nga kumpirmado natapnan han Covid-19.
Dida han iginpagawas nga opisyal nga pahayag han LGU yana nga kulop, an namatay in babaye nga 70-anyos ug residente han Brgy Basiao. Hiya in binawi-an hin kinabuhi kakulop, Setyembre 2, ha EVRMC-Magsaysay. An iya record in nagpapakita nga nag-antos hiya hin Septic Shock from Acute Pyelonephritis Bilateral, Diabetic Keto Acidosis Covid-19 Critial.
Tulo ka semana antis hiya ma-ospital nag-araba na hiya hin kama-ol-ol han iya surok-surok, pero waray hiranat, ubo ngan sip-on, Gindara hiya ha Basey District Hospital para hin check-up ngan nasabtan nga mayda niya UTI.
Bisan kun nagtinumar hiya hin medesina, nagpadayon an kama-ol-ol nga iya gin-aantos, sanglit gindara na hiya ha EVRMC para hin hingpit pa nga eksaminasyon. Ginkuhaan hiya hin swab test hadton Agosto 31, ngan gumawas an resulta nga positibo hiya han Covid kakulop nga amo gihapon an adlaw han iya kamatay.
Iginlubong dayon an patay nga lawas han pasyente komo pagsunod han DOH Protocol. Kadagmitan naman nga nagdumara hin contact tracing an mga otoridad han panlawas.
Ini nga kamatay han Covid Patient nga taga Basey in deri lakip han 25 nga nahireport han DOH kakulop nga Covid Deaths ha Eastern Visayas. An iginreport han ahensya in tobtob la han Agosto 30 nga panhitabo.
Hapagkayana, mayda pa 25 nga Active Cases ha Basey. Umabot na hin 116 an nagpositibo dida han bungto pero kadam-an na ha ira an nakatalwas tikang han impeksyon han kagaw. #
