Isumat.com/8:43AM, September 03, 2020
Deri na basta-basta nga makakasulod ngan deri na makakagsudoy-sudoy ha syudad han Tacloban an mga ambulansya tikang ha iba nga lugar.
Hi Ronnie Cornico, nagmamangulo han TOMECO, an nagpahayag nga deri na pasusudlon ha Tacloban an mga ambulansya nga damo nga mga pasyente an sakay. Han una nga adlaw, hi Mayor Alfred Romualdez an nagsering nga posible magtapon-tapon an kagaw kun damo an mga pasyente dida han ambulansya.
Ngatanan nga ambulansya nga masulod han syudad in mag-aagi na hin hingpit nga inspection sumala kan Cornico. Mayda obserbasyon an TOMECO nga mayda nakakalusot hanhadi nga mga pasaheros han ambulansya bisan waray mga sakit.
Igindugang pa ni Cornico nga kun maghahatod hin pasyente ngadto ha EVRMC-Cabalawan, didto la ma-istambay an ambulansya ngan deri tutugutan nga pumakadto ha downtown samtang ginhuhulat an pasyente nga nagpapakunsulta. Kun waray huhulaton, kinahanglan bumalik dayon ha ira gintikangan nga lugar an behikulo.
Kun an ambulansya in mapakadto ha EVRMC-Magsaysay ngan mga pribado nga hospital ha Downtown-Tacloban, didto hira ha Office of Civil Defense Hub-Leyte Park Hotel ma-istambay samtang naghuhulat han pasyente nga ira iginhatod.
Igindig-on han TOMECO nga deri na puede magliniyong-liyong an mga ambulansya ha iba nga parte han syudad. Gintotoohan nga ini nga pitad in makakabalabag han paglarab han Covid-19. #
