Isumat.com/7:16AM, September 01, 2020
Mayda na liwat namatay nga pasyente han Covid-19 sanglit umabot na ha 24 katawo ha Eastern Visayas nga natapnan han kagaw an binawi-an han kinabuhi subay han pahayag han DOH Regional Office kakulop, Agosto 31.
Mayda gihapon 51 nga bag-o nga mga kaso an rehiyon. Tungod hini, aada na ha 3,003 an mga nagpositibo ngan hapagkayana 1,241 an Active Cases. Umabot naman ha 1,738 an naka-recover katapos la mahipatik an 101 nga bag-o nga nakatalwas. Aada naman ha 299 an mga Health Workers an nagkatatapnan.
Dida han mga bag-o nga kaso, an syudad han Catbalogan an nagsakmomo hin 26 nga natapnan. Hira in mga iginka-urusa ngan natapnan han mga naha-una nga nagpositibo han kagaw. Ha kabug-usan, 428 na an nagpositibo nga Catbaloganon.
Ini nga numero han natapnan ha Catbalogan amo gihapon an kadamo-on han mga nagkatatapnan ha Tacloban City. Kakulop, duha an nahidugang ha Tacloban sanglit 428 gihapon an suma-total han naigo han virus nga Taclobanon.
10 naman nga pasyente an nahidugang ha Villareal, samtang tag-usa an natapnan ha Paranas ngan Calbayog City.
Ha probinsya han Leyte, 2 an bag-o nga kaso ha Dagami, ngan tag-urusa ha Kananga, Palo, Tolosa, Albuera, Villaba, Tanauan, Matag-ob ngan Pastrana; samtang usa naman an bag-o nga positibo ha Llorente, E. Samar.
Ha luyo nga bahin, iginkalipay naman han Ormoc City PNP nga negatibo an resulta han swab test han 98 nga kapulisan han syudad. Iginpailarum han testing an kapulisan han matapnan an ira igkasi pulis. Tungod hini, iginkwarentina ha sulod mismo han ira opisina an mga kapulisan ha Ormoc City Station ngan Station 2.
Bisan kun negatibo an resulta han swab test, igpapadayon la gihapon han haros usa ka gatos nga kapulisan an ira kwarentina tobtob nga makumpleto an duha ka semana nga waray gawas-gawas komo pagsunod han patakaran han DOH. #
