Isumat.com/2:30PM August 28, 2020
Nanawagan hin pagburublig han ngatanan an City Government han Tacloban tungod kay nakaka-alarma na an padayon nga paghinitaas han kaso han Covid-19 dida han syudad.
Hi Brando Bernadas, an nangungulo han City Disaster Risk Reduction and Management Office an naghangyo ha mga Taclobanon ug an mga nag-uukoy gawas han syudad para hin hingpit nga kooperasyon basi mautod na an paglarab han virus. Sering pa man ni Bernadas, makababaraka ini nga kahimtang kun magpabilin ini.
An mga opisyales han syudad ha panguna ni Mayor Alfred Romualdez in nagdumara hin miting kanina han aga tungod han kinada-adlaw nga damo an natatapnan ha Tacloban, labi na an kakulop kun diin 43 an bag-o nga nagpositibo. Hapagkayana hapit na 300 an kaso ha Tacloban ngan porlomenos 200 an Active Cases.
Nagsering hi Bernadas nga damo an nagkakatatapnan ha Tacloban ha mga paru-pamilya tungod han mga ginhimo nga katitirok sugad hin fiesta, birthday party ngan iba pa nga okasyon.
Nanginyupo gihapon an opisyal ha mga Frontliners nga tikang ha gawas han Tacloban nga deri na magsudoy-sudoy sugad han pagkadto ha mga grocery ngan iba pa nga establisemento katapos nira pagdul-ong hin pasyente ha Tacloban kay posible hira in nagdadara han virus.
Nanawagan liwat hi Bernadas ha mga Health Workers han iba nga hospital ngan Dialysis Centers ha Tacloban nga deri na mag-inuli-uli ha ira balay kay peligroso ini. Kun nagin Close Contact hin nagpositibo nga pasyente ngan mayda inaabat nga deri maupay ha panlawas, dapat mag-Isolate na ngan deri na gumawas ha balay.
Iginpatapod niya nga an mga personales han City Hospital ngan City Health Office sugad man Frontliners han City Government in nag-uukoy ha ira Holding Area.
Para naman han mga iginka-urusa han mga miembro han pamilya nga nagpositibo, nanawagan hi Bernadas nga makigsumpayan ha ira opisina ngan deri na maglinakat kay bangin natapnan na hira han virus.Nagsumat hi Bernadas nga mayda iginkaka-urusa han mga natapnan pero deri hira nagsusumat ngan ini nga sitwasyon in dako an kadelikaduhan nga igdudurot.
Iginbuyagyag pa han opisyal nga damo la gihapon an nagkakadadakop nga menor de edad nga nagkikinalakat bisan gab-i sanglit iya ginsagdunan an mga kag-anak nga disiplinahon an ira mga anak. #
