Isumat.com/8:09AM, August 12, 2020 (Updated 1:55PM, August 12, 2020)
Igindig-on han 52nd Infantry Batallion han Philippine Army ha Brgy Dao, Oras, E Samar nga waray magsinodoy-sudoy didto han bungto an sundalo nga nagpositibo han Covid-19.
Dida han panmaki-ana han Isumat.com kan 1Lt Jermaine Gentiles, tagyakan han Army Battalion, hinsabutan nga an sundalo in didto la pag-istar hin malaybalay gawas han kampo han pag-abot niya tikang ha Laguna hadton Agosto 6. Hi Gentiles in nagsumat pa nga an sundalo in nag proseso han iya retirement papers ha Manila ngan umuli ngadto han iya pamilya ha Laguna antis bumalik han iya kampo ha Oras.
Waray na ini pakasulod han kampo han iya pag-abot ngan didto la han malaybalay kumaturog kay pagkabuwas, pumakadto na ha Tacloban para han rapid testing ngan swab test. Pero nag-ukoy liwat hiya hin usa ka adlaw ha lodging house ha Tacloban samtang naghuhulat han resulta han rapid test, pahayag pa han tenyente.
Waray makigsumpayan an sundalo ha LGU-Oras ngan sumakay la hiya hin pampasahero nga van tikadto ha Tacloban.
Sugad-sugad nga gingamit hin usa nga kaapi han Philippine Army an iya kina-adman ha pag-eskapo o paglusot tikang ha mga kaaway. An makuri la kay waray hiya maka-ikyas tikang han Covid-19 ngan naka-alarma an iya kahimtang ha ira kampo ngan nagdurot hin pagkabaraka han mga bungtuhanon.
Dida han 55 nga mga bag-o nga Positive Cases nga iginpasamwak kakulop (Agosto 11) han DOH Regional Office, usa han natapnan an Authorized Person Outside Residence (APOR) nga iginrehistro nga tikang ha Oras, E. Samar. Iginsumat han LGU-Oras nga waray hira sarabutan han aktibidad hini nga lalaki kay waray koordinasyon ha munsipyo.
Subay han impormasyon nga nakuha han Isumat.com, an 44-anyos nga sundalo in nagbyahe tikang ha Laguna tikadto han Army Battalion ha Brgy Dao, Oras kun diin hiya naka-destino. Hadton Agosto 6, umabot hiya ngadto han nasabi nga lugar. Sumakay hiya hin pribado nga behikulo tikang ha Laguna ngan humaw-as hiya ha Brgy Buray, Paranas, Samar. Tikang ha Buray, sumakay hiya hin pampubliko nga transportasyon ngadto ha Oras.
Pag-abot niya ha ira kampo, waray hiya pasudla ngan ginmanduan hiya nga magpa rapid test. Pagkabuwas, nagbiyahe hiya ha Tacloban pinaagi hin pampubliko nga van ngan pumakadto hiya ha Divine Word Hospital. Positibo hiya ha Rapid Test sanglit ginpa-ilarum hiya han swab test ngan gumawas dida han Confirmatory Test nga positibo hiya han virus.
Nakigsumpayan an hospital ha LGU ngan ginsundo han mga personales han munsipyo an sundalo tikang ha hospital ngan igin-akomodar ha Isolation Unit han bungto. Hapagkayana, ini nga pasyente in mayda mild symptoms sugad han ubo ngan makatol nga but-ol. Libre gihapon an iya pagkaon ngan mga panginahanglan nga iginhahatag han LGU. Ini an gisasyahani nga kaso nga nahipatik didto hini nga munisipalidad.
Ginhihimo naman yana han mga health personnel an contact tracing han posible nga iginka-urusa hini nga tawo labi na dida han iya pagbiyahe.
Kadam-an nga Orasnon an nagpabati hin kahadlok tungod kay mayda mga sumat-sumat nga pumakadto pa ini nga sundalo hin pira nga parte han bungto antis hiya magpa-rapid test ngan swab test ha Tacloban. Hira in nabibido nga an syahan nga kaso nga natabo in deri pa gud residente han bungto ngan waray makigsumpayan ha LGU.
Tobtob han ginsusurat ini nga notisya, naniningkamot pa an Isumat.com nga makahimangraw an 8th Infantry Division han Philippine Army basi masabtan kun ano nga mga aksyon an ira bubuhaton kasumpay han binuhatan hini nga sundalo.
Kun aton manunumduman, ginbansagan nga mga “Ninja” an mga indibiduwal nga deri nagpapasabot ha LGU kun mabalik tikang ha iba nga lugar. #
