Isumat.com/4:00AM, August 8, 2020
Sugad-sugad nga nagsarang na an COVID-19 ha Brgy Villa Aurora ha Basey, Samar katapos la nga madugangan hin 19 nga Positive Cases kakulop (Agosto 7) dida han nasabi nga lugar. An DOH Regional Office in nagreport hin bag-o nga 57 nga kaso han Region 8 kun diin lakip ini nga mga Basaynon.
Kun aton manunumduman, pira pala ka adlaw an nag-agi, mayda magtala-amay didto ha Villa Aurora an nagpositibo han kagaw ug hira in waray travel history ngan deri man liwat hira mga Locally Stranded Individuals. Waray pa kasabti kun hin-o an nakatapon ha ira o diin hira katapni.
An 19 nga bag-o nga kaso dida han barangay amo an mga close contacts han magtala-amay. Iginbalhin na hira ngatanan tikang han barangay ngadto han Municipal Isolation Unit. Iginmando naman han LGU ha mga residente han barangay nga deri la anay magkagawas han ira balay samtang padayon ginhihimo an contact tracing. Ha luyo nga bahin, nag negatibo naman an resulta han swab samples han mga personales ha Basey District Hospital nga iginkahibalag han syahan nga nagpositibo nga taga Villa Aurora nga nagpakunsulta didto han hospital.
Samtang, iginreport han Tacloban City Health Office nga mayda na liwat Local Resident nga natapnan han virus. Bootsidsngon, waray gihapon hiya travel history ngan deri LSI. Hiya in 33-anyos nga babaye ngan burod hin walo ka bulan. Nagdudumara gihapon hin contact tracing an mga otoridad.
Mayda liwat bag-o nga health worker nga natapnan. Hiya in 28-anyos nga babaye nga taga Matag-ob, Leyte. An usa nga bag-o nga natapnan dida hini nga bungto in LSI tikang ha Makati.
An iba nga mga nagpositibo in ngatanan LSI labot la hin duha nga OFW.
Julita-2, Kananga-2, Carigara-2, Palompon-3, Burauen-1, Baybay-2, Mahaplag-2, Tabango-1, Abuyog-1, Capoocan-1, Isabel-1, Tolosa-1, Javier-1, (Leyte); San Sebastian-1, Villareal-1 (Samar); Taft-1 (eastern Samar); Hinunangan-4, Sogod-4, San Juan-2, Limasawa-2 (Southern Leyte).
Umabot na 1,201 an mga nagpositibo ngan 794 (66%) an naka-recover denhi ha Eastern Visayas. An Active Cases in 404 hapagkayana. #
