Isumat.com/7:54AM, July 15, 2020
Ha syahan nga higayon tikang mahimugso an laboratory testing han COVID-19 ha Eastern Visayas, naka-eksperiensya an rehiyon hin usa ka adlaw nga waray nahipatik nga bag-o nga kaso bisan kun damo nga swab samples an ginproseso han duha nga laboratoryo ha aton lugar.
Kakulop, Hulyo 14, an Eastern Visayas Regional Covid Testing Center ngan Divine Word Hospital Laboratory in nagproseso hin 155 nga samples. Upat an nagpositibo han corona virus pero ini in mga re-swab han mga pasyente nga natapnan hanhadi, boot sidngon waray bag-o nga natapnan.
Lakip dida han negatibo an resulta han mga samples tikang hin 26 nga personales han EVRMC.
Tungod hini, nagpapabilin nga 653 an natapnan ngan mayda 3 nga naka-recover kakulop, sanglit umabot na ha 610 an recoveries.
Iginpasamwak naman han EVRCTC nga waray na backlog han samples nga ira igpapailarum ha confirmatory test. Kun aton manunumduman, ginsuspender han EVRCTC hin tulo ka adlaw an pagkarawat han samples tungod kay duro na hin kadamo an iginsubmiter han mga LGUs. Pero nanlimbasog an nasabi nga laboratoryo ngan kakulop, natapos nira pag proseso an nabibilin nga mga samples.
Nangangandaman naman yana an DOH, LGUs, sugad man an duha nga laboratoryo han posibilidad nga paghitaas na liwat han igpapadangat nga mga swab samples tungod han pagtugot nga makabalik na liwat nganhi ha Region 8 an mga Locally Stranded Individuals. #
