Isumat.com/9:15AM, July 13, 2020
Katapos magbarubalhin hin mga destino ha Visayas, Mindanao ngan Manila ha paghalpat han mga sindikato hin droga ngan paghilambigit hin mga kontrobersiya, nahibalik ha Eastern Visayas an binansagan nga “Drug War Poster Boy” han Pilipinas.
Hi Lt Colonel Jovie Espenido in malingkod yana komo bag-o nga Deputy for Operations han kanan Samar Provincial Police Office. An Samar PNP in pinamumunu-an ni Col. Andre Dizon.
Hadin nag-agi nga bulan, ginkumpirmar ni Regional PNP Director General Bernabe Balba nga nahibalik hi Espenido ha Region 8 pero ginpamulat anay kun ano nga pwesto an iya pagkakaptan. Hi Espenido in nahibutang ha ‘floating status” ha Campo Crame han mahilakip hiya dida han gin-aalegar nga protektor han iligal nga droga.
Hadin Pebrero, hi Espenido an ginlaknit komo Deputy for Operations han Bacolod City PNP tungod han iya paghidabi han sobra 300 nga kapulisan dida han “Narcolist”. Tobtob yana, waray notisya kun ano na an natabo hito nga listahan.
Antis hiya na-assign ha Bacolod, nagin Chief of Police hiya ha Ozamiz City kun diin iya ginpangunahan an pagronda han panimalay han pamilya Parohinog nga gin-aalegar nga sindikato hin droga. Nagin madugo an nasabi nga insidente kay 15 nga miembro han pamilya an namatay.
Hi Espenido in nagin Chief Of Police ha Albuera, Leyte kun diin nabungkag an drug sindicate ni Kerwin Espinosa. Pero ha deri pala maiha, iginbuyagyag ni Espenido nga nagpapadayon an operasyon han sindikato ha Luzon bisan kun aadto ha karsel hi Espinosa. #
