Isumat.com/4:40PM, June 18, 2020
Magdudumara hin imbestigasyon an PNP-Highway Patrol Group kasumpay han insidente ha Borongan City kun diin usa nga opisyal han grupo an waray sumunod han health protocols han syudad para han nagkaka-abot tikang ha iba nga lugar.
Hi Police General Eliseo Cruz, hepe han PNP-HPG, in nagseguro nga iimbestigaron nira ini nga panhitabo kun diin hi Lt Col Joel Ana ug an iya convoy in waray daw magpa-inspeksyon han ira pag-agi ha Brgy Locsoon, Borongan checkpoint hadin Sabado han gab-i.
Nagsumat hi Cruz nga hi Ana in iya ginmanduan hadto nga magbiyahe ha Region 8 basi magdul-ong hin mga ekipahis han HPG-Eastern Visayas.
Katapos han iya pagdeliver han mga higamit ha Tacloban, hi Ana in pumakadto ha Borongan nga amo an iya ginikanan nga lugar, pero dida han nasabi nga checkpoint nagderuderetso la an iya van nga may escort nga duha nga dagko nga motorsiklo. Hinsabutan nga pira la ka oras hi Ana ha ira balay ngan bumalik na ha Manila.
Hi Ana in nagsumat kan Cruz nga naghinay-hinay hira han harani na hira han checkpoint, pero waray man personales han checkpoint an nagpa-ukoy ha ira ug nag- “wave” la daw an mga nagdudumara han checkpoint.
Ha atubangan hini, ginseguro han heneral nga makikigsumpayan hiya ha City Government han Borongan.
Hadin Martes, mayda report nga gin-aandam na han mga otoridad ha Borongan an posible nga pagsampa hin kaso kontra han opisyal.
Hi City Mayor Jose Ivan Agda in nagbuyagyag nga tobtob yana waray pa mensahe o pakig-istorya ha iya hi Ana nga igkasi niya Boronganon. #
