Isumat.com/9:20AM, June 13, 2020
Ginsampaan na hin kaso han Taft Inter-Agency Task Force (IATF) an konsehal han bungto ngahi Marvin Lim, an iya amay nga hi anay Mayor Diego Lim ug an iya misis nga hi Elsa, ngan an Rural Health Officer Dr. Imelda Abenio.
Subay han pahayag tikang ha Provincial Government han Eastern Samar ginsampaan hin kaso kriminal an nasabi nga mga personales tungod han gin-aalegar nga pakasupak han mga Health Protocols nga gin-implementar han LGU kasumpay han COVID-19 pandemic. An kaso in iginsalawad ha Provincial Prosecutors Office.
Kun aton manunumduman, pira na ka adlaw an nakalabay, hi Konsehal Lim ug an iya kag-anak in umulpot sakay han ira kalugaringon nga behikulo ngadto ha Taft tikang ha Manila. Gin-aalegar nga waray magsunod han patakaran an pamilya kay imbes nga didto hira han gintudlok nga Quarantine Facility temporaryo nga maukoy, pumakadto lugod an grupo han ira panimalay ha sulod hin resort.
Hi Eastern Samar Governor Ben Evardone in nagpahayag nga deri ini matadong nga binuhatan han pamilya Lim, labi na an konsehal, kay imbes nga magigin modelo hiya ha pagsunod han balaud, hiya lugod an sumupak hini.
Nahidabi an Rural Health Officer ngahi Dr. Abenio kay nag-interbener daw ini basi deri mahingadto han Quarantine Facility han bungto an pamilya.
Igindig-on naman han pamilya Lim nga waray nira gintalapas nga balaud kay kumpleto hira hin papeles ngan igintutugot daw ha Taft an Home Quarantine. Gin-ayat pa ni Lim an hin-o man nga agrabyado nga magsampa hin reklamo kun mag positibo hira han corona virus.
Nagsering hi Taft Mayor Gina Ty nga mayda pagbag-o han guidelines han bungto nga nagpapahayag nga deri puede an Home Quarantine.
Tobtob han ginsusurat ini nga notisya, waray pa magpagawas hin pahayag an pamilya Lim ug hi Abenio kasumpay han pagsampa hin kaso kontra ha ira. # (KEVIN SIOSANA)
