Isumat.com/2:13PM, June 9, 2020
Kun mayda SAP Cash Assistance para han mga kablas ngan nawarayan pakabuhi ngan iba pa nga ayuda, mayda gihapon natagamtaman nga hinabang an mga parag-uma yana nga panahon han krisis tungod han COVID-19 Pandemic.
Iginreport han Department Of Agriculture Regional Office 8 nga 48,528 nga parag-uma ha bug-os nga rehiyon an naka-agom han tag singko mil nga ayuda pinansyal tikang han nasabi nga ahensya han gobyerno.
Ini nga ayuda pinansyal in nahidistribuer ngadto han mga benefeciario pinaagi han pakigbinuligay han Land Bank of the Philippines dida han pay-out. Sumala kan Regional Director Angel Enriquez, hadton Mayo 8 nagtikang an panhatag han mao nga ayuda.
Ha ilarum han programa, an naka-agom hini amo an mga nag-uuma hin hin usa ka ektarya o guruguti pa nga umhanan. Maabot hin 55, 938 an target benefeciaries hini nga programa nggan ginlalauman nga makukumpleto na an panhatag hini ha deri maiha nga panahon, sering pa ni Enriquez.
30,461 an mga benefeciario han programa ha Leyte ngan Biliran samtang an makakakarawat ha Samar in maabot naman hin 18, 067 nga parag-uma.
An National Government in nag-alotaga hin Tres Bilyones Pesos nga pondo para hini nga programa. Hapagkayana, naabot na ha 86.75% an accomplishment han DA para hini nga proyekto. Iginsaad han departamento nga ha deri maiha nga panahon matatapos nira an panhatag bisan pa man may nga nakakadelatar han aktibidad sugad nala han pagtampalo ni Bagyo Ambo ha Eastern ngan Northern Samar.
Pira ka adlaw nga nadelatar an panhatag han ayuda pinansyal kay an mga personales han DA in nagtutok anay han assesment han distroso ni Ambo ha agrikultura ug han kaangayan nga aksyon para han mga apektado nga mag-uuma han bagyo. # (KEVIN SIOSANA)
