Isumat.com/2:40PM, June 4, 2020
Nagtatangis nga naghangyo hi Divina Cabangunay ha grupo han New Peoples’s Army nga igbalik ha ira pamilya nga buhi an iya mister nga hi Cosme ug mga anak ngahira Jevie ngan Jason.
Hi Cosme ug an iya duha nga anak in ginskimit hin gin-aalegar mga rebelde nga NPA han maagahon han Mayo 27 ha ira panimalay ha Brgy Canvais, Motiong, Samar. An tulo in anay kaapi han rebelde nga kagi-usan pero sumurender na hadto ngan nagin kaapi na han “Motiong Peacebuilders.”
Sumala kan Divina, unta malooy ha ira pamilya an mga rebelde labi na nga an iya mister ug duha nga anak nga lalaki an nagpapakabuhi para ha ira. Hi Divina in masinakitnon na ngan aada yana ha iya an upat pa nira mga anak nga na-eskwela pa ha High School ngan duha nga mga apo.
Hinsabutan gihapon nga an asawa ni Jevie in bag-o pala nga nag-anak hadin nag-agi nga bulan.
Nagsering hiya nga waray kasaypanan hira Cosme ug an duha niya nga mga anak ha pagsurender hadto kay karuyag la nira hin mamurayaw nga kinabuhi.
Kadungan hini, hi Motiong Mayor Renato Cabael in nanawagan gihapon ngadto han mga rebelde nga igbalik ha ira pamilya an tulo ka tawo nga ginkuha.
Nagpahayag naman hi Col. Camilo Ligayo, Commander han 801st Brigade han Philippine Army, nga bubuhaton han militar an ngatanan basi madakop an mga nagpapaluyo hini nga panhitabo basi umatubang hira han hustisya. Nanawagan gihapon an opisyal ha mga rebelde nga igbalik hira Cosme ha ira pamilya ngan sumurender gihapon hira basi makatagamtam han mga programa han gobyerno para han ira utro nga pakig-urusa ha katilingban. # (KEVIN SIOSANA)
