Isumat.com/3:31PM, May 29, 2020
Mahugot nga ginsukna ni Ormoc City Mayor Richard Gomez an pahayag ni Presidential Legal Counsel Salvador Panelo nga natatarantar daw an alkalde mahitungod han pagkabalik han mga OFWs ngan iba pa nga na- stranded han corona virus lockdown.
Hi Panelo in nagsering nga natatarantar hi Gomez tungod han pag reklamo han opisyal nga waray insakto nga koordinasyon an mga ahensya han gobyerno para han Balik-Probinsya nga programa.
Gintagan hin duon ni Gomez nga deri hiya natatarantar, an iya la gin-aaro nga sundon an ginkasarabutan nga mayda temprano nga pasabot ha mga LGUs kun mayda magkaka-abot nga mga OFWs ngan stranded nga katawhan.
Nagpabati gihapon hin kabido an amay han Ormoc tungod daw han sayop nga impormasyon nga nakadangat kan Presidente Rodrigo Duterte. Han una nga adlaw, hi Duterte in nagpahayag nga deri naruruyag hi Gomez pagkarawat han nagkaka-uli nga mga Ormocanon. Sumala han aktor-pulitiko, deri ini tinood kay waray pa ngani ini nga Balik-Probinsya Program han gobyerno, nag-andam na an iya syudad pagkarawat han mga magkakabalik. Sering pa niya, may mga tawo nga nagsumat hin deri insakto nga impormasyon han Pangulo.
Hadton Abril 20, mayda na Executive Order hi Gomez para han Resident Recovery Program nga an panuyo an pagkarawat han magkakabalik nga Ormocanon pero pinaagi hin hapsay nga proseso basi deri magdurot hin peligro ha syudad.
An Ormoc in nag-andam hin sobra 500 nga housing units para han mga magkakabalik, pero istrikto liwat nga ginpapatuman an mga border control point guidelines.
Nanawagan hi Gomez ha National Inter-Agency Task Force nga abisuhan hin temprano an mga LGUs basi hul-os an preparasyon ngan deri nakakalasan. Iginreklamo pa niya nga an iba nga mga nagka-abot in waray ngani kaangayan nga mga papeles.
Hi Panelo amo anay an Presidential Spokesperson nga ginliwanan ni Harry Roque. Kun aton manunumduman, han bag-o pala nga naglalarab ini nga kagaw, hi Panelo an nagpahayag nga natatambal ini nga sakit pinaagi han pagkina-on hin saging nga ginriwahan naman han mga otoridad han panlawas. # (KEVIN SIOSANA)
