Isumat.com/1:46PM,May 29, 2020
Nadugangan hin lima ka tawo an mga nagkatatapnan han COVID-19 denhi ha Eastern Visayas. Inin in subay han gibabag-uhi nga pahayag han DOH-Regional Office nga ginpagawas pasado ala una yana nga kulop.
An Eastern Visayas Regional Covid Testing Center an nagpagawas han resulta han confirmatory test para hin 178 katawo ngan 173 an negatibo ug lima naman an posiitibo han virus.
Upat han nag positibo in mga taga Tarangnan, Samar. Ginlalakipan ini hin 12 anyos nga babaye; 26 anyos nga lalaki; 59 anyos nga babaye ngan 8 anyos nga lalaki. Hira in igbabalhin ha Community Isolation Unit ha ira bungto.
Ha luyo naman nga bahin, nag positibo gihapon han virus in usa nga Overseas Filipino Worker nga taga Hilongos, Leyte. Hiya in 31 anyos nga lalaki nga umabot ha Tacloban Airport hadton Mayo 25. Nagtatrabaho hiya ha gawas han nasud komo usa nga seaman. Hapagkayana, aadto hiya ha Isolation Unit ha Hilongos ngan waray ginpapakita nga sintomas han sakit. Waray pa hiya igka-urusa han iya pamilya kay deretso man hiya ha Isolation Unit tikang han iya pag-abot.
Dara hini, an Surveillance Team han DOH in nakigsumpayan na ha Civil Aviation Authority-Tacloban para han contact tracing han iya iginka-urusa ha eroplano ug han iya mga iginka-urupod han iya byahe tikadto ha Hilongos.
Tungod hini nga mga bag-o nga Positive Cases, umabot na ha 36 ka tawo an natapnan han ginkakahadlukan nga kagaw ha aton rehiyon. 20 ha ira an naka-recover na ngan waray naawat an kinabuhi.
An DOH in padayon an panginyupo ha publiko nga igpadayon an tim-os nga paghirot kontra han virus kay nagpapabilin an kataragman nga durot hini ha katawhan. # (KEVIN SIOSANA)
