Isumat.com/10:00AM, May 28, 2020
Mayda na 31 katawo an natapnan han corona virus ha Sinirangan Bisayas. Ini in dara han nahidugang nga bag-o nga tulo ka tawo nga nagpositibo han kagaw.
An DOH-Regional Office in nagpahayag yana nga aga hini nga mga resulta han swab samples nga iginpa-ilarum han confirmatory test.
Hi EV Patient # 29 in taga Tarangnan, Samar, babaye ngan 50 anyos. An EVRTC Laboratory in nagpagawas kakulop han resulta hin 180 nga samples ug ini la nga babaye an nag positibo.
Ha luyo nga bahin, hi EV Patient # 30 in 36 anyos nga lalaki nga taga Tanauan, Leyte, samtang hi Patient # 31 in 21 anyos nga lalaki nga taga Baybay City. Ini nga duha in upod dida han 1st Batch han Balik-Probinsya Program nga umabot ha Leyte hadton Mayo 22, 2020.
An swab samples hini ngaduha an ginpa laboratory test ha Divine Word Hospital. An mga samples han iba pa nga Balik-Probinsya in ginhuhulat pa an resulta.
Ini nga bag-o nga tulo nga Positive Cases in magpapabilin ha ira tagsatagsa nga Community Isolation Units. Nagsumat pa an DOH nga maupay an ira panlawas ngan deri hira nagpapakita hin sintomas han sakit.
Kagab-i, igin-anunsyo na ni Baybay City Mayor Jose Carlos Cari nga may natapnan han virus ha ira syudad.
Suma-total mayda na 31 ka tawo an tikang ha aton rehiyon an natapnan han kagaw, kun diin 20 na ha ira an naka-recover. # (KEVIN SIOSANA)
