Isumat.com/10:32PM, May 27, 2020
Iginpasamwak ni Mayor Jose Carlos Cari han Baybay City, Leyte nga mayda usa ka tawo nga nag positibo han corona virus didto han nasabi nga syudad.
Dida han iya personal nga pamulong ha facebook pasado alas 9 yana nga gab-i, hi Cari in nagbuyagyag nga ini nga tawo in lakip dida han syahan nga batch han nakabalik ha ira lugar hadton Biernes tikang ha Manila ha ilarum han Balik-Probinsya Program.
Nagsumat an alkalde nga pag-abot han grupo ha Baybay, kadagmitan nira ginbuhat an Rapid Testing ngan ini nga tawo nag positibo, sanglit ginkuhaan hiya hin swab sample para han Laboratory PCR Test ngan nakumpirmar nga natapnan gud man hiya han virus.
Kasumpay hini, iginpatapod naman ni Cari nga nagdumara na hira hin contact tracing basi masabtan kun hira hin-o an iginkahibalag hini nga tawo ngan ginbubuhat nira an ngatanan basi deri ini magsarang nga kagaw ha ira lugar.
Labot la han syahan nga batch, mayda gihapon katawhan nga nagka-abot ha Baybay kada adlaw tikang han Biernes nga nakatagamtam liwat han Balik-Probinsya Program.
Ha kasaysayan han corona virus ha Region 8. ini an gisasyahani nga higayon nga an mayor han lugar an nag-anunsyo nga may Positive Case ha iya nasasakupan. Kun aton manunumduman, pirmi gud an DOH-Regional Office an nagpapahayag hini ha publiko. Pero tobtob han ginsusurat ini nga notisya, waray pa pormal nga pasamwak an ahensya mahitungod hini. # (KEVIN SIOSANA)
