Isumat.com/4:16PM, May 22, 2020
Samtang nagtikang na an pagka-abot han mga katawhan tikang ha Manila nganhi ha Eastern Visayas dara han Balik-Probinsya Program, nakabalik gihapon nganhi ha aton rehiyon in duha ka grupo nga mga OFWs nga na-stranded ha Cebu.
Sumala han impormasyon tikang kan DILG Regional Director Darwin Bibar, 43 ini nga mga OFWs nga umabot ha Cebu tikang ha iba nga nasud samtang naka-lockdown an bug-os nga Pilipinas dara han covid-19 pandemic. Nagtalinguha an DILG pinaagi han ira OFW Desk Officer nga makabalik na ha Eastern Visayas ini nga mga OFWs.
Tikang ha Cebu, sumakay hira hin barko tipakadto ha Hilongos, ngan tikanag didto nakabalik hira ha ira tagsatagsa nga probinsya. 13 ha ira in taga Leyte; 17 an taga Southern Leyte; 4 an Taclobanon; 6 an taga Samar; 2 an taga Eastern Samar ngan 1 an Biliranon.
Nagsering an DILG nga iginpa-ilarum na han swab testing ini nga mga OFWs ngan negatibo hira han corona virus pero magkakaada pa hira hin duha ka semana nga kwarentina pag-abot ha ira lugar.
Kun aton manunumduman, padayon nga nagtitikahitaas an ihap han mga tawo nga natatapnan han virus ha Cebu. # (KEVIN SIOSANA)
