Isumat.com/5:14PM,May 21, 2020
Aminado hi Mayor Alfred Romualdez nga magtitikahitaas an peligro han posible nga pagsarang han corona virus ha Tacloban City ha takna nga magka-abot na an mga residente han syudad nga na-stranded ha Metro Manila ngan iba pa nga lugar han nasud dara han nationwide lockdown.
Yana man gud nga semana magtitikang na an pagkabalik han mga Taclobanon nga apektado han lockdown ug naka-andam na an City Government pagkarawat han mga Returning Residents ha ilarum han Balik-Tacloban nga programa.
Dida han programa nga “Straight to the Point” ha iFM-RMN Tacloban, nagsumat hi Romauldez nga bisan ngani hanhadi nga waray pa nagkakabalik nga mga katawhan nagpapabilin an kadelikaduhan, labi na yana nga waray na kaseguraduhan kay an magkaka-uli in tikang hin mga lugar nga damo an nag positibo han kagaw.
Dara hini, utro nanawagan an alcalde ha mga syudadanon nga deri gud tumagya ngan doblehon pa an paghirot kay deri na kita maaram yana kun an aton iginkakahibalag nga mga tawo in posible nagdadara han virus. Iya gud igindig-on nga pirmi magsul-ot han face mask kun magawas ha balay ug sundon an physical distancing.
Hapagkayana an mga otorisado nga personales han City Hall in nandadakop ngan nanmumulta han mga katawhan nga waray face mask ha pampubliko nga lugar.
Prayoridad han City Government nga ha ira tagsatagsa nga panimalay ig-kwarentina an mga magkakabalik kun may bastante nga facilidad didto han ira balay para han Home Isolation. Pero kun deri akos an kwarentina didto han panimalay, sasagdunan an Balik-Taclobanon nga ha mga Isolation Units han Tacloban hira temporaryo mag-uukoy ha sulod hin duha ka semana.
Tobtob yana nga adlaw, umabot na ha 1,175 an nagprehistro han Balik-Tacloban ngan mayda pa sobra tres syentos nga bag-o nga aplikante.
Dida han nag parehistro, aprubado na han City Government nga aada ha Home Quarantine an 273, samtang an igbubutang ha Quarantine Facilities in aada na ha 32 ka tawo. # (KEVIN SIOSANA)
